എണ്ണ ഉത്പാദന നിയന്ത്രണം അടുത്ത വർഷവും തുടരാൻ ഒപെകും​ ഇതര രാഷ്ട്രങ്ങളും തമ്മില്‍ ധാരണ

ഈ വർഷം അവസാനം വരെ മാത്രം ഉത്പാദനം നിയന്ത്രിക്കാനാണ്​ നിലവില്‍ ധാരണയുള്ളത്

എണ്ണ ഉത്പാദന നിയന്ത്രണം അടുത്ത വർഷവും തുടരാൻ ഒപെക്​,ഒപെക്​ ഇതര രാഷ്ട്രങ്ങൾ തമ്മില്‍ ധാരണ. ഈ വർഷം അവസാനം വരെ മാത്രം ഉത്പാദനം നിയന്ത്രിക്കാനാണ്​ നിലവില്‍ ധാരണയുള്ളത്. മസ്കത്തിൽ ചേര്‍ന്ന മന്ത്രിതല നിരീക്ഷണ കമ്മിറ്റി യോഗത്തിന്​ ശേഷം സൗദി ഊര്‍ജ മന്ത്രി ഖാലിദ്​ അൽ ഫാലിഹ്​ ആണ്​ ഉത്പാദന രാഷ്ട്രങ്ങൾ തമ്മിലെ സഹകരണം തുടരാനുള്ള സാധ്യതയെ കുറിച്ച്​ വ്യക്തമാക്കിയത്​.

ആഗോളതലത്തിലെ എണ്ണ നീക്കിയിരിപ്പിന്​ അനുസരിച്ചാകും പുതിയ തീരുമാനം. എണ്ണ ശേഖരം പ്രതീക്ഷക്ക്​ അപ്പുറം പോകുന്ന പക്ഷം നിയന്ത്രണം 2019ലും തുടരുന്നത്​ പരിഗണിക്കാൻ ഉത്പാദന രാഷ്ട്രങ്ങൾ നിർബന്ധിതരാകും. എന്നാൽ സഹകരണം ഏത്​ രീതിയിൽ തുടരണം എന്നതിനെ കുറിച്ച്​ ഇതുവരെ അന്തിമ ധാരണയായിട്ടില്ലെന്നും ദീർഘകാല സഹകരണം സംബന്ധിച്ച്​ കൂടുതൽ ചർച്ചകൾ നടത്തേണ്ടതെന്നും അൽ ഫാലിഹ്​ പറഞ്ഞു. 2017 ജനുവരി മുതൽ ഒരു വർഷത്തേക്ക്​ ഉത്പാദനം നിയന്ത്രിക്കാനാണ്​ ആദ്യം തീരുമാനിച്ചത്​. വിപണിയിലുള്ള അധിക എണ്ണ ഇല്ലാതാക്കുന്നതിനായി ഇത്​ പിന്നീട്​ 2018ലേക്കും നീട്ടുകയായിരുന്നു. വിപണിയെ ആരോഗ്യവസ്ഥയിൽ എത്തിക്കുന്നതിന്​ ഉത്പാദക രാഷ്ട്രങ്ങൾക്ക്​ ഇനിയുമേറെ പ്രവർത്തിക്കാനുണ്ടെന്നും അദ്ദേഹം പറഞ്ഞു. വില ഉയർത്തുന്നതിന്​ പകരം വിപണിയിലെ അധിക എണ്ണകുറക്കുകയാണ്​ ഉത്​പാദന നിയന്ത്രണത്തിന്റെ ലക്ഷ്യമെന്ന്​ വാർത്താസമ്മേളനത്തിൽ പങ്കെടുത്ത ഒമാൻ എണ്ണ മന്ത്രി ഡോ.മുഹമ്മദ്​ ബിൻ ഹമദ്​ അൽ റുംഹി പറഞ്ഞു. നിലവിലെ വില എണ്ണമേഖലയിലെ നിക്ഷേപങ്ങൾക്കും ആഗോള സമ്പദ്​ഘടനക്കും ആരോഗ്യകരമാണ്​.