ദുബൈ ഫ്രെയിം ജനുവരി ഒന്നിന്​ സന്ദർശകർക്കായി തുറക്കും

രാവിലെ പത്തു മുതൽ വൈകിട്ട്​ ഏഴു വരെയാകും സന്ദർശന സമയം

വിസ്മയത്തിന്റെ പുതുലോകം സമ്മാനിക്കുന്ന ദുബൈ ഫ്രെയിം ജനുവരി ഒന്നിന്​ സന്ദർശകർക്കായി തുറക്കും. രാവിലെ പത്തു മുതൽ വൈകിട്ട്​ ഏഴു വരെയാകും സന്ദർശന സമയം. നഗരമധ്യത്തിൽ തല ഉയർത്തി നിൽക്കുന്ന ഈ മനോഹര സ്തൂപം കാണാനും കയറാനും ആയിരങ്ങൾ എത്തിച്ചേരും എന്നാണ്​ പ്രതീക്ഷ.

സഫാരിക്കു പിന്നാലെ ഫ്രെയിം ഒരുക്കേിയാണ്​ ദുബൈ നഗരം താമസക്കാരെയും സന്ദർശകരെയും ഒരുപോലെ അദ്ഭുതപ്പെടുത്തുന്നത്​. സാബീൽ പാർക്കിൽ 150 മീറ്റർ ഉയരത്തിലും 93 മീറ്റർ വീതിയിലുമായി സുതാര്യമായ ചില്ലുകളുടെ രണ്ട് വൻ സ്തൂപങ്ങൾ. 93 മീറ്റർ നീളമുള്ള കണ്ണാടിപ്പാലം തന്നെയാണ്​ വിസ്മയ സൗധത്തിന്റെ പ്രധാന പ്രത്യേകത. ചില്ലുപാളിയിൽ ചവുട്ടിനിന്ന്​ ചുവടെയുള്ള സൗന്ദര്യം ആസ്വദിക്കാം.

ദുബൈയുടെ രണ്ട്​ ഭാവങ്ങൾ 360 ഡിഗ്രിയിൽ കാണാം. വടക്ക് ഭാഗത്ത് ശെഖ്​ സായിദ് റോഡിനോടു ചേർന്ന കെട്ടിടങ്ങളടങ്ങുന്ന പുതിയ ദുബൈ. തെക്കു ഭാഗത്ത് ദേര, ഉമ്മു ഹുറൈർ, കരാമ എന്നിവയുൾപ്പെട്ട പൗരാണിക ദുബൈ നഗരം. തീർന്നില്ല. അമ്പതാണ്ടുകൾക്കപ്പുറമുള്ള ദുബൈ എങ്ങനെ ആയിരിക്കുമെന്ന ഫ്യൂച്ചർ ദുബായ് വിഡിയോ പ്രദർശനവും ദുബൈ ഫ്രെയിമിൽ ഒരുക്കിയിട്ടുണ്ട്​.

പകൽ സ്വർണ നിറത്തിലാണ് ദുബൈ ഫ്രെയിം. രാത്രികാലത്ത് നിറം മാറും. പൗരാണിക ദുബൈയുടെ മുദ്രകൾ ഉൾച്ചേർന്ന മ്യൂസിയം കടന്നു വേണം മുകളിലെത്താൻ. വളർച്ചക്കിടയിലും ഇന്നലെകൾ മറക്കാനുള്ളതല്ലെന്ന ഓർമപ്പെടുത്തൽ കൂടിയാണ്​ മ്യൂസിയം. ലിഫ്റ്റിൽ മുകളിലേക്കുള്ള യാത്രയും ആഹ്ലാദകരമായ അനുഭവമാണ്​ സന്ദർശകർക്ക്​ സമ്മാനിക്കുക. 25 കോടി ദിർഹം ചെലവിട്ടാണ്​ നിർമാണം.