പത്തു വർഷത്തിനുള്ളിൽ ഇറാനെതിരെ യുദ്ധത്തിന് സാധ്യതയുണ്ടെന്ന് സൗദി കിരീടാവകാശി

യുദ്ധം ഒഴിവാക്കാൻ ഇറാനെ നിയന്ത്രിക്കണമെന്നും അദ്ദേഹം ​ പറഞ്ഞു

പത്തു വർഷത്തിനുള്ളിൽ ഇറാനെതിരെ യുദ്ധത്തിന് സാധ്യതയുണ്ടെന്ന് സൗദി കിരീടാവകാശി ​മുഹമ്മദ്​ ബിൻ സൽമാൻ. യുദ്ധം ഒഴിവാക്കാൻ ഇറാനെ നിയന്ത്രിക്കണമെന്നും അദ്ദേഹം ​ പറഞ്ഞു. വാൾസ്ട്രീറ്റ്​ ജേണലിന്​ നൽകിയ അഭിമുഖത്തിലാണ് മുന്നറിയിപ്പ്.

യുദ്ധം ഒഴിവാക്കാൻ രാജ്യാന്തര സമൂഹം ഇറാനുമേൽ സാമ്പത്തിക, രാഷ്​ട്രീയ സമ്മർദ്ദം ശക്തിപ്പെടുത്തണമെന്ന് സൗദി കിരീടാവകാശി അമീർ മുഹമ്മദ്​ ബിൻ സൽമാൻ പറഞ്ഞു. ഇറാനുമേൽ കൂടുതൽ വിലക്കുകൾ ഏർപ്പെടുത്തണം. അത്​ അവർക്ക്​ കൂടുതൽ സമ്മർദ്ദമുണ്ടാക്കും. യുദ്ധം ഒഴിവാക്കാനാണ്​ സൌദി ശ്രമിക്കുന്നത്​. ഈ ശ്രമങ്ങൾ വിജയിച്ചില്ലെങ്കിൽ ഇറാനുമായി അടുത്ത 10 -15 വർഷത്തിനുള്ളിൽ യുദ്ധമുണ്ടാകാനുള്ള എല്ലാ സാധ്യതയുമുണ്ട്​. വാൾസ്​ട്രീറ്റ്​ ജേണലിന്​ നൽകിയ അഭിമുഖത്തിൽ അമീർ മുഹമ്മദ്​ പറഞ്ഞു. സൗദിക്കെതിരെ യമനിലെ ഹൂതികൾക്ക്​ ഇറാൻ ആയുധങ്ങൾ നൽകുകയാണ്​. ഹൂതികളുടെ ആക്രമണങ്ങൾ ദൗർബല്യത്തിന്റെ ലക്ഷണമാണ്​. അവരുടെ സംവിധാനം തകരും മുമ്പ്​ കഴിയുന്ന കാര്യങ്ങളൊക്കെ അവർ ചെയ്യുകയാണ്​. യമനിൽ ഇടപെടാതിരിക്കാൻ സൗദിക്ക്​ കഴിയുമായിരുന്നില്ല. 2015 ൽ ​ഇടപെട്ടില്ലായിരുന്നെങ്കിൽ ഹൂതികൾക്കും അൽഖാഇദക്കുമിടയിൽ യമൻ വിഭജിച്ചുപോയേനെ. ഭീകരരുടെ സൃഷ്ടികേന്ദ്രമാണ്​ മുസ്ലിം ബ്രദർഹുഡ്​. തീവ്രവാദത്തെ ​ ഇല്ലായ്മ ചെയ്യേണ്ടതുണ്ടെന്നും തീവ്രവാദ ആശയങ്ങൾ ഇല്ലാതെ ആരും ഭീകരരാകില്ലയെന്നും അഭിമുഖത്തിൽ കിരീടാവകാശി കൂട്ടിച്ചേർത്തു.