വാറ്റിന്റെ മറവില്‍ ഉപഭോക്താക്കളെ ചൂഷണം ചെയ്യുന്നവർക്കെതിരെ കർശന മുന്നറിയിപ്പുമായി യുഎഇ

തെറ്റായ നീക്കം നടത്തുന്നവർക്കെതിരെ നിയമനടപടി സ്വീകരിക്കുന്നതിനു പുറമെ ബന്ധപ്പെട്ട സ്ഥാപനങ്ങളിൽ നിന്ന്​ വൻതുക പിഴയും ഈടാക്കും

മൂല്യവർധിത നികുതിയുടെ മറവിൽ ഉപഭോക്താക്കളെ ചൂഷണം ചെയ്യുന്നവർക്കെതിരെ കർശന മുന്നറിയിപ്പുമായി യുഎഇ അധികൃതർ. തെറ്റായ നീക്കം നടത്തുന്നവർക്കെതിരെ നിയമനടപടി സ്വീകരിക്കുന്നതിനു പുറമെ ബന്ധപ്പെട്ട സ്ഥാപനങ്ങളിൽ നിന്ന്​ വൻതുക പിഴയും ഈടാക്കും. ജനുവരി ഒന്നു മുതലാണ്​ യുഎഇയിൽ വാറ്റ്​ നടപ്പാക്കുന്നത്​.

മൂല്യവർധിത നികുതി നടപ്പാക്കുന്ന സാഹചര്യം മുതലെടുത്ത്​ നിശ്ചിത വിലയിലും കൂടുതൽ ഈടാക്കുന്ന ചില്ലറവിൽപന വ്യാപാരികൾ, വിതരണക്കാർ എന്നിവരിൽനിന്ന്​ ലക്ഷം ദിർഹം വരെ പിഴ ഈടാക്കും. സാമ്പത്തിക മന്ത്രാലയമാണ്​ വാറ്റിന്റെ പേരിൽ മുതലെടുപ്പ്​ നടത്തുന്നവർക്കെതിരെ കർശന മുന്നറിയിപ്പ്​ നൽകിയത്​.

രാജ്യത്ത്​ വാറ്റ്​ പ്രാബല്യത്തിലാകുന്ന ജനുവരി ഒന്നിന്​ മുമ്പും ശേഷവും വിപണിയിൽ നിരീക്ഷണം നടത്താൻ സാമ്പത്തിക മന്ത്രാലയം മറ്റു സാമ്പത്തിക സ്ഥാപനങ്ങളുമായി സഹകരിച്ച്​ കമ്മിറ്റി രൂപവത്​കരിച്ചതായി ഉപഭോക്​തൃ സംരക്ഷണ വകുപ്പ്​ ഡയറക്​ടർ ഡോ. ഹാശിം ആൽ നു​ഐമി വ്യക്തമാക്കി. ഈ കമ്മിറ്റി മിന്നൽ പരിശോധന നടത്തും. ഏതെങ്കിലും തരത്തിലുള്ള നിയമലംഘനം കണ്ടെത്തിയാൽ ഉടൻ നടപടി സ്വീകരിക്കും. വാറ്റ്​ പരിധിക്ക്​ പുറത്ത്​ വില ഉയർത്തിയാൽ ലക്ഷം ദിർഹം വരെ പിഴ ഈടാക്കാൻ ഉപഭോക്തൃ സംരക്ഷണ നിയമം നിർദ്ദേശിക്കുന്നുണ്ടെന്നും മന്ത്രാലയം വ്യക്തമാക്കി. പ്രതിവർഷം മൂന്നേമുക്കാൽ ലക്ഷം ദിർഹത്തിൽ കൂടുതൽ വിറ്റുവരവുള്ള എല്ലാ സ്ഥാപനങ്ങൾക്കും വാറ്റ്​ ബാധകമാക്കാനാണ്​ തീരുമാനം.