റമദാനിൽ ഹറമിലേക്കും തിരിച്ചും തീർഥാടകര്‍ക്കായി​ 2000 ബസുകൾ ഏർപ്പെടുത്തുന്നു

ഹറമിലെ നമസ്കാരങ്ങളിൽ പങ്കെടുക്കുന്നവർക്ക്​ മക്കയുടെ വിവിധ ഭാഗങ്ങളിൽ നിന്നാണ്​ ബസുകൾ സർവീസ്​ നടത്തുക

റമദാനിൽ മക്കയിലെ ഹറമിലേക്കും തിരിച്ചും തീർഥാടകരുടെ യാത്രക്ക്​ 2000 ബസുകൾ ഏർപ്പെടുത്തുന്നു. ഹറമിലെ നമസ്കാരങ്ങളിൽ പങ്കെടുക്കുന്നവർക്ക്​ മക്കയുടെ വിവിധ ഭാഗങ്ങളിൽ നിന്നാണ്​ ബസുകൾ സർവീസ്​ നടത്തുക. എട്ട്​ ദശലക്ഷം സർവീസുകളിലായി 40 ദശലക്ഷം തീർഥാടകരെ ഹറമിലേക്കും തിരിച്ചും എത്തിക്കാനാണ്​ പദ്ധതി.

മക്ക ഹറമിനടുത്ത്​ ഗതാഗത കുരുക്കൊഴിവാക്കാൻ വിവിധ സ്​റ്റേഷനുകളിൽ നിന്ന്​ ആളുകളെ ഹറമിലേക്കും തിരിച്ചും എത്തിക്കുന്ന ചെയിൻ ബസ്​ സർവീസ്​ പദ്ധതി ഏതാനും വർഷം മുമ്പാണ്​ ആരംഭിച്ചത്​. നല്ല ഫലം കണ്ടതിനെ തുടർന്നാണ്​ ഇത്തവണ പദ്ധതി വിപുലമാക്കാൻ ബന്ധപ്പെട്ട വകുപ്പുകൾ തീരുമാനിച്ചിരിക്കുന്നത്​. 2000 ത്തോളം ബസുകളാണ്‌ ഇതിനായി വിനിയോഗിക്കുക. വിവിധ പാർക്കിങ്​​ കേന്ദ്രങ്ങളിൽ നിന്ന്​ ഹറമിലേക്കും ​ തിരിച്ചും ബസ്​ സർവീസ്​ ഉണ്ടാകും. മക്ക ഗവർണറും ഹജ്ജ്​ കമ്മിറ്റി അധ്യക്ഷനുമായ അമീർ ഖാലിദ്​ അൽഫൈസലിന്റെ അധ്യക്ഷതയിൽ ചേർന്ന യോഗത്തിൽ ഈ വർഷം വിവിധ ഗവണ്‍മെന്റ്​ വകുപ്പുകൾക്ക്​ കീഴിലെ റമദാൻ ഒരുക്കങ്ങൾ വിലയിരുത്തി. റമദാനിൽ ഹറമിലേക്കും തിരിച്ചും തീർഥാടകരുടെ യാത്രക്കായുള്ള പദ്ധതി, ഇരുഹറം കാര്യാലം, ഹറം സുരക്ഷ വിഭാഗം, മുനിസിപ്പാലിറ്റി, ​ട്രാഫിക്​, ആരോഗ്യം തുടങ്ങിയ വകുപ്പുകൾക്ക്​ കീഴിലെ പദ്ധതികൾ യോഗത്തിൽ വിലയിരുത്തി.