എണ്ണ ഉൽപാദനം വെട്ടിച്ചുരുക്കൽ: സൗദിക്കെതിരെ തിരക്കിട്ട നടപടി ഉണ്ടാകില്ലെന്ന്​ അമേരിക്ക

എണ്ണ ഉൽപാദനം വെട്ടിച്ചുരുക്കാനുള്ള ഒപെക്​ തീരുമാനത്തിന്റെ പേരിൽ സൗദി അറേബ്യക്കെതിരെ തിരക്കിട്ട നടപടി ഉണ്ടാകില്ലെന്ന്​ അമേരിക്ക. എല്ലാ തലങ്ങളുമായും കൂടിയാലോചന നടത്തിയാകും മുന്നോട്ടുപോവുകയെന്ന്​ യു.എസ്​ നേതൃത്വം അറിയിച്ചു. സൗദി അറേബ്യക്ക്​ പൂർണ പിന്തുണ പ്രഖ്യാപിച്ച്​ ഗൾഫ്​ രാജ്യങ്ങളടക്കം രംഗത്തുവന്ന സാഹചര്യത്തിലാണ്​ യു.എസ്​ മനംമാറ്റം.

അമേരിക്കയുടെ താൽപര്യങ്ങളും ഇരു രാജ്യങ്ങളും തമ്മിലുള്ള ബന്ധവും പരിഗണിച്ചു മാത്രമാകും നടപടിയെന്ന്​ യു.എസ്​ ദേശീയ സുരക്ഷാ ഉപദേഷ്​ടാവ്​ ജെയ്ക്​ സുള്ളിവൻ പറഞ്ഞു. അതേസമയം റഷ്യക്കൊപ്പം ചേർന്ന് ​അമേരിക്കയുടെ താൽപര്യങ്ങൾക്കെതിരെയുള്ള നീക്കം മുൻനിർത്തി ബന്ധത്തിൽ പുനഃപരിശോധന നടത്തുമെന്നും അദ്ദേഹം സൂചിപ്പിച്ചു.

സി.എൻ.എൻ ചാനലിനു നൽകിയ അഭിമുഖത്തിലാണ്​ സുരക്ഷാ ഉപദേഷ്ടാവിന്റെ പ്രതികരണം. സൗദി അറേബ്യയുമായുള്ള ഭാവി ബന്ധം വേറിട്ട്​​ പുനഃപരിശോധിക്കാൻ ബൈഡൻ തയാറല്ല. കോൺഗ്രസ്​ പ്രതിനിധികളുമായി ആലോചിച്ച് ​ഇരുരാജ്യങ്ങൾക്കും ഒത്തുചേർന്നുള്ള പ്രവർത്തനത്തിന്​ രൂപം നൽകുമെന്നും അദ്ദേഹം വ്യക്തമാക്കി.

സുരക്ഷാ സഹായം ഉൾപ്പെടെ സൗദിയുമായുള്ള പുതിയ സമീപനത്തിന്​ നിരവധി വഴികളുണ്ടെന്നും ജെയ്​ക്​ സള്ളിവൻ വിശദീകരിച്ചു. തിരക്കിട്ട്​ സൗദി ബന്ധത്തിൽ നടപടിക്ക്​ അമേരിക്ക ഒരുക്കമല്ല. ആവശ്യത്തിന്​ സമയമെടുത്ത്​ എന്താണ്​ യു.എസ്​ താൽപര്യമെന്ന്​ വിലയിരുത്തി മാത്രമാകും തീരുമാനമെന്നും അമേരിക്കൻ സുരക്ഷാ ഉപദേഷ്ടാവ്​ പറഞ്ഞു.