ബഹ്​റൈനിൽ വർഷം തോറും 95 ദശലക്ഷം ദിനാറിന്‍റെ ഭക്ഷണം പാഴാക്കുന്നതായി യു.എൻ റിപ്പോർട്ട്​

ബഹ്​റൈനിൽ വർഷം തോറും 95 ദശലക്ഷം ദിനാറിന്‍റെ ഭക്ഷണ സാധനങ്ങൾ പാഴാക്കുന്നതായി യു.എൻ റിപ്പോർട്ട്​. ഓരോരുത്തരും 132 കിലോ വീതം ഭക്ഷണ സാധനങ്ങളാണ്​ വർഷം തോറും പാഴാക്കുന്നത്​. മൊത്തം 2,30,000 ടൺ ഭക്ഷണ വസ്​തുക്കളാണ്​ ഇത്തരത്തിൽ പാഴാകുന്നത്​.

അറേബ്യൻ ഗൾഫ്​ യൂണിവേഴ്​സിറ്റിയിൽ സംഘടിപ്പിച്ച ശിൽപശാലയിലാണ്​ റിപ്പോർട്ട്​ ചർച്ചക്കെടുത്തത്​. ഭക്ഷണം പാഴാക്കുന്നത്​ ഒഴിവാക്കുന്ന രീതിയിൽ ജീവിത ശൈലി രൂപപ്പെടുത്തേണ്ടതുണ്ടെന്ന്​ പരിപാടിയിൽ പ​ങ്കെടുത്തവർ അഭിപ്രായപ്പെട്ടു. യു.എൻ പരിസ്​ഥിതി വിഭാഗത്തിന്​ കീഴിൽ രണ്ട്​ ശിൽപശാലകളാണ്​ യൂണിവേഴ്​സിറ്റിയിൽ നടന്നത്​.

മാലിന്യ നിർമാർജനവുമായി ബന്ധപ്പെട്ട്​ നടന്ന ശിൽപശാലയിലാണ്​ രാജ്യത്ത്​ പാഴാക്കുന്ന ഭക്ഷണ വസ്​തുക്കളുടെ കണക്ക്​ യു.എൻ പരിസ്​ഥിതി പദ്ധതി പശ്ചിമേഷ്യ റീജ്യണൽ കോഡിനേറ്റർ താരിഖ്​ അൽ ഖോരി അവതരിപ്പിച്ചത്​. ലോകത്ത്​ മൊത്തം931 ദശലക്ഷം ടൺ ഭക്ഷ്യ വസ്​തുക്കളാണ്​ 2019ൽ പാഴാക്കിയത്​.

ഭക്ഷണത്തിന്‍റെ അമിതോപയോഗം നിയന്ത്രിക്കുന്നതിനും പാഴാക്കൽ തടയുന്നതിനും കൃത്യമായ അവബോധം ആവശ്യമാണെന്ന്​ അറേബ്യൻ ഗൾഫ്​ യൂണിവേഴ്​സിറ്റിയിലെ പ്രകൃതി വിഭവ, പരിസ്ഥിതി വകുപ്പ്​ മേധാവി ഡോ. സുമയ്യ യൂസുഫ്​ പറഞ്ഞു. സ്​മാർട്ട്​ പർച്ചേസും ശരിയായ ഉപഭോഗവും പ്രകൃതിക്കിണങ്ങുന്ന ഉൽപന്നങ്ങളുടെ ഉപയോവും പ്രോൽസാഹിപ്പിക്കപ്പെടേണ്ടതുണ്ട്​.

ഒറ്റത്തണവ ഉപയോഗിച്ച്​ വലിച്ചെറിയുന്ന സാധനങ്ങളും ടിന്നിലടച്ച ഭക്ഷണ വസ്​തുക്കളും ഒഴിവാക്കേണ്ടതുണ്ടെന്നും അവ വാങ്ങുന്നതിന്​ മുമ്പായി ഉപയോഗ യോഗ്യ തീയതി ഉറപ്പാക്കേണ്ടതാണെന്നും അവർ കൂട്ടിച്ചേർത്തു.