കുവൈത്തില്‍ 35 കല്യാണമണ്ഡപങ്ങൾ അടച്ചുപൂട്ടി

അറ്റകുറ്റപ്പണികളുടേയും സേവന കരാറുകളുടേയും അഭാവത്തെ തുടര്‍ന്ന് കുവൈത്തില്‍ 35 കല്യാണമണ്ഡപങ്ങൾ അടച്ചുപൂട്ടി. സാമൂഹികകാര്യ മന്ത്രാലയത്തിന് കീഴിലുള്ള മണ്ഡപങ്ങളാണ് അടച്ചുപൂട്ടിയതെന്ന് പ്രാദേശിക മാധ്യമമായ അൽ-ഖബസ് റിപ്പോര്‍ട്ട് ചെയ്തു.

നേരത്തെ ചിലവ് ചുരുക്കലിന്‍റെ ഭാഗമായി വിവിധ സർക്കാർ ഏജൻസികളുടെ ബജറ്റ് 20 ശതമാനം വെട്ടി കുറച്ചിരുന്നു. ഇതിനെ തുടര്‍ന്ന് ഹാളുകളുടെ അറ്റകുറ്റപ്പണികൾക്കുള്ള ടെണ്ടറുകൾ റദ്ദാക്കിയിരുന്നു.

അതിനിടെ ഹാളുകളുടെ നടത്തിപ്പ് സഹകരണ സംഘങ്ങൾക്ക് കൈമാറുവാനുള്ള നീക്കവും നടക്കുന്നതായി റിപ്പോര്‍ട്ടുകളുണ്ട്.