ഇസ്രായേലിന്‍റെ ആക്രമണത്തിൽ പരിക്കേറ്റ കുട്ടികളെയും അർബുദ രോഗികളേയും ചികിത്സക്കായി യു.എ.ഇയിലെത്തിച്ചു

യു.എ.ഇ: ഇസ്രായേലിന്‍റെ ആക്രമണത്തിൽ പരിക്കേറ്റ കുട്ടികളും അർബുദ ബാധിതരും അടങ്ങുന്ന ഒരു സംഘത്തെ കൂടി ചികിത്സക്കായി യു.എ.ഇയിലെത്തിച്ചു. ഗസ്സ മുനമ്പിലെ ആശുപത്രിയിൽ നിന്നാണ്​ എട്ടാമത്​ ബാച്ച് യു.എ.ഇയിലെത്തിയത്​. അബൂദബിയിലെ വിവിധ ആശുപത്രികളിലാണ്​ ഇവർക്ക്ചികിൽസ നൽകി വരുന്നത്​. ഗസ്സയിൽ പരിക്കേറ്റ 1000 കുട്ടികൾക്കും 1000 അർബുദ രോഗികൾക്കും ചികിത്സ ലഭ്യമാക്കുമെന്ന​ യു.എ.ഇ പ്രസിഡന്‍റ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാന്‍റെ പ്രഖ്യാപനം നടപ്പിലാക്കുന്നതിന്‍റെ ഭാഗമായാണ്​നടപടി.

അടിയന്തര ചികിത്സ ആവശ്യമുള്ള 28 രോഗികളും അവരോടൊപ്പമുള്ള 35 കുടുംബങ്ങളുമാണ്​ അൽ ആരിഷ്​ അന്താരാഷ്ട്ര വിമാനത്താവളത്തിൽ നിന്ന്​ വെള്ളിയാഴ്ച അബൂദബി വിമാനത്താവളത്തിൽ ഇറങ്ങിയത്​. ഗസ്സയിലെ ഫലസ്തീൻ നിവാസികളെ സഹായിക്കുന്നതിനായി കഴിഞ്ഞ നവംബറിലാണ്​​ 'ഗാലന്‍റ്​ നൈറ്റ്​3' സംരംഭം യു.എ.ഇ പ്രസിഡന്‍റ്​ പ്രഖ്യാപിച്ചത്​.

ഇതിന്‍റെ ഭാഗമായി ഗസ്സ മുനമ്പിൽ യു.എ.ഇ 150 കിടക്കകളുള്ള ഫീൽഡ്​ ആശുപത്രി സ്ഥാപിച്ചിരുന്നു. ഇവിടെ 100 ലധികം അടിയന്തര ഓപറേഷനുകളാണ്​ ഇതുവരെ നടന്നത്​. ഗാലന്‍റ്​ നൈറ്റ്​3 ഒപറേഷന്‍റെ കണക്കുകൾ പ്രകാരം ജനുവരി നാലുവരെ 395 ഫലസ്തീനിയൻ കുട്ടികളും അർബുദ ബാധിതരും യു.എ.ഇയിലെത്തിയിട്ടുണ്ട്​. ഇതോടെ ചികിത്സ തേടിവരുടെ എണ്ണം 1098 ആയി. ഗസ്സ നിവാസികൾക്ക്​ കുടിവെള്ളം എത്തിക്കുന്നതിനായി യു.എ.ഇ സർക്കാർ കടൽവെള്ളം ശുദ്ധീകരിക്കുന്ന പ്ലാന്‍റും നിർമിച്ചിരുന്നു. കൂടാതെ തണുപ്പിനെ പ്രതിരോധിക്കാനും വസ്ത്രങ്ങളും ഭക്ഷ്യവസ്തുക്കളും എത്തിക്കുന്ന നടപടിയും തുടരുകയാണ്​.