'ആഗോളവിഷയങ്ങളിൽ യോജിച്ച പോരാട്ടം'; ഇന്ത്യ-യു.എ.ഇ ബന്ധം ശക്തിപ്പെടുത്താൻ ധാരണ

അബൂദബി: ഇന്ത്യ-യു.എ.ഇ ബന്ധം ശക്തിപ്പെടുത്താൻ ധാരണ. സാമ്പത്തിക, നിക്ഷേപ മേഖലകളിലെ സഹകരണത്തിനൊപ്പം ആഗോളതലത്തിലെ രാഷ്ട്രീയ പ്രശ്നങ്ങളിലും യോജിച്ച നിലപാടുകൾക്ക്​ ശ്രമം തുടരുമെന്ന്​ ഇരു രാജ്യങ്ങളും വ്യക്തമാക്കി. യു.എൻ രക്ഷാസമിതിയിൽ ഇന്ത്യക്ക്​ സ്ഥിരാംഗത്വം വേണമെന്ന നിലപാടിന്​ കൂടുതൽ ശക്തി പകരാനും യു.എ.ഇ ശ്രമം തുടരും. സമഗ്ര സാമ്പത്തിക കരാര്‍ ഇരുരാഷ്ട്രങ്ങളും തമ്മിലെ ബന്ധം പുതിയ തലങ്ങളിലേക്ക്​ വികസിപ്പിച്ചതായി കഴിഞ്ഞ ദിവസം അബൂദബിയിൽ സമാപിച്ച ചതുര്‍ദിന ഇന്ത്യ ഗ്ലോബല്‍ ഫോറം വിലയിരുത്തി.

സെപ കരാർ ഒപ്പുവെച്ച് ഒമ്പതു മാസത്തിനുള്ളിൽ ഉഭയകക്ഷി വ്യാപാരത്തിൽ 30 ശതമാനം വർധനവാണ്​ രൂപപ്പെട്ടത്​. ഇതുവരെയും സഹകരണമില്ലാതിരുന്ന മേഖലകളില്‍ കൂടി സഹകരിക്കാന്‍ കരാര്‍ സഹായിച്ചതായി കേന്ദ്ര വിദേശകാര്യ മന്ത്രി ഡോ. എസ്​ ജയശങ്കർ അഭിപ്രായപ്പെട്ടു. മന്ത്രിമാരായ ശൈഖ്​ അബ്​ദുല്ല, നൂറ അല്‍ കഅബി എന്നിവരുമായും കേന്ദ്രവിദേശകാര്യ മന്ത്രി എസ്. ജയശങ്കർ കൂടിക്കാഴ്ച നടത്തി. യു.എന്‍ സുരക്ഷാ സമിതിക്കു മുമ്പാകെ കഴിഞ്ഞ ദിവസം ഇന്ത്യക്ക്​ വേണ്ടി ശക്​തമായി വാദിക്കാൻ യു.എ.ഇ നീക്കം നടത്തിയത്​ ഉഭയകക്ഷി ബന്​ധത്തി​ന്‍റെ ഊഷ്​മളതയാണ്​ തെളിയിച്ചത്​. കൗണ്‍സിലില്‍ ഇന്ത്യയുടെ ശബ്ദം അനിവാര്യമാണെന്നും യു.എ.ഇ മന്ത്രി നൂറ അൽ കഅബി വ്യക്​തമാക്കിയിരുന്നു. യുക്രയിൻ യുദ്ധം ഉൾപ്പെടെയുള്ള വിഷയങ്ങളിൽ യോജിച്ച പ്രശ്​നപരിഹാരത്തിന്​ നീക്കം തുടരാൻ ഇന്ത്യയും യു.എ.ഇയും തീരുമാനിച്ചതും ശ്രദ്ധേയമാണ്​.