യു.എ.ഇയിൽ വാണിജ്യ ഏജൻസി നിയമം കർശനമാക്കി; ലംഘിച്ചാൽ പിഴക്ക് പുറമെ ചരക്ക്​ കണ്ടുകെട്ടും

യു.എ.ഇയിൽ പരിഷ്കരിച്ച വാണിജ്യ ഏജൻസി നിയമം ലംഘിച്ചാൽ സാമ്പത്തികകാര്യ മന്ത്രാലയം കനത്ത പിഴ ചുമത്തും. ഒരു ലക്ഷം മുതൽ നാലു ലക്ഷം ദിർഹം വരെ പിഴ ഏർപ്പെടുത്തുമെന്നാണ്​ അധികൃതർ നൽകുന്ന മുന്നറിയിപ്പ്​. നിയമലംഘനം തെളിഞ്ഞാൽ ചരക്കുകൾ പിടി​ച്ചെടുക്കാനാണ്​ തീരുമാനം. ഒരു അന്താരാഷ്ട്ര ബിസിനസ്​ സംരംഭം കരാറിൽ ഏർപ്പെട്ട ഏജന്‍റിനല്ലാതെ സ്ഥാപനങ്ങൾക്കോ വ്യക്​തികൾക്കൊ ഉൽപന്നങ്ങൾ വിൽപന നടത്താൻ പാടില്ല.

നിയമം ലംഘിച്ചാൽ വൻതുക ഫൈൻ ഉൾപ്പെടെ കടുത്ത നടപടി നേരിടേണ്ടി വരും. ഇതിനു പുറമെയാണ്​ അയച്ച​ ചരക്കുകൾ പിടിച്ചെടുക്കുമെന്ന മുന്നറിയിപ്പും. നേരത്തെയുള്ള നിയമത്തിൽ സുപ്രധാന മാറ്റമാണ്​ വരുത്തിയിരിക്കുന്നത്​​. മുൻപൊക്കെ ഇത്തരം കാര്യങ്ങൾ സിവിൽ കോടതിയുടെ പരിഗണനക്ക്​ വിടുകയായിരുന്നു പതിവ്​. എന്നാൽ പുതിയ നിയമത്തിൽ രണ്ട്​ തരത്തിൽ ഫൈൻ ചുമത്താനാണ്​ വകുപ്പുള്ളത്​. നിയമലംഘനത്തിന്​ ആദ്യം മുന്നറിയിപ്പ്​ കൈമാറും. ആവർത്തിച്ചാൽ ഒരു ലക്ഷം മുതൽ രണ്ടു ലക്ഷം വരെ ഫൈൻ ചുമത്തുകയും ചരക്ക്​ പിടിച്ചെടുക്കുകയും ചെയ്യും. തെറ്റ്​ ആവർത്തിക്കുന്ന സാഹചര്യമുണ്ടായാൽ ഫൈൻതുക​ നാലു​ ലക്ഷം വരെയായി ഉയർത്തും.

കരാർലംഘനങ്ങൾ കുറ്റകൃത്യമായി പരിഗണിക്കുമെന്ന വ്യക്​തമായ സന്ദേശമാണ്​ അന്താരാഷ്ട്ര സ്ഥാപനങ്ങൾക്ക്​ യു.എ.ഇ ഇതിലൂടെ നൽകുന്നത്​. യു.എ.ഇ സ്വദേശിക്ക്​ കുറഞ്ഞത് 51 ശതമാനം ​ അവകാശമുള്ള പൊതു ഓഹരി ഉടമകളുടെ കമ്പനികൾക്ക് വാണിജ്യ ഏജൻസി പ്രവർത്തനങ്ങളിൽ ഏർപ്പെടാം എന്നാണ്​ പുതിയ നിയമം പറയുന്നത്​.