ദുബൈ ഗ്ലോബൽ വില്ലേജ് 27ാം സീസൺ: വി.ഐ.പി ടിക്കറ്റുകൾ 24 മുതൽ

ദുബൈ ​ഗ്ലോബൽ വില്ലേജിന്‍റെ 27ാം സീസണിലേക്ക്​ വി.ഐ.പി ടിക്കറ്റുകൾ ഈ മാസം 24മുതൽ ലഭിക്കും. വി.ഐ.പി എൻട്രി ടിക്കറ്റ്​, മുൻഗണനയോടെ പാർക്കിങ്​ സൗകര്യം, വൻഡർ പാസുകൾ എന്നിവയടങ്ങുന്നതാണ്​ വി.ഐ.പി പാക്കുകൾ.

ഒക്​ടോബർ 25ന്​ ആരംഭിക്കുന്ന സീസണിന്‍റെ വി.ഐ.പി ടിക്കറ്റുകൾ വാങ്ങുന്ന ഒരു ഭാഗ്യശാലിക്ക്​ പ്രത്യേക കാഷ്​ പ്രൈസും അധികൃതർ പ്രഖ്യാപിച്ചു​. ഒരു വി.ഐ.പി പാക്കിനുള്ളിൽ സ്വർണ്ണ നാണയം ഒളിപ്പിച്ചുവെക്കുകയും ഇത്​ ലഭിക്കുന്നയാൾക്ക്​27,000 ദിർഹം ക്യാഷ് പ്രൈസ് ലഭിക്കുകയുമാണ്​ ചെയ്യുക.വിർജിൻ മെഗാസ്റ്റോർ ടിക്കറ്റ് വെബ്സൈറ്റ് വഴിയാണ്​ ടിക്കറ്റ്​ ലഭിക്കുക.

നാലുതരം വി.ഐ.പി പാക്കുകളാണ്​ പ്രഖ്യാപിച്ചിട്ടുള്ളത്​. 6,000 ദിർഹം വിലയുള്ള ഡയമണ്ട് വി.ഐ.പി പാക്ക്​, 2,500 വിലയുള്ള പ്ലാറ്റിനം പാക്ക്​, 1950ദിർഹമിന്‍റെ ഗോൾഡ്​ പാക്ക്​, 1600ദിർഹം വിലയുള്ള സിൽവർ പാക്ക്​ എന്നിവയാണിത്​. സാധുവായ എമിറേറ്റ്സ് ഐഡിയുള്ള 18 വയസ്സിന്​ മുകളിൽ പ്രായമുള്ള വ്യക്തികൾക്ക് ഒരാൾക്ക് എട്ട് വി.ഐ.പി പാക്കുകൾ വരെ വാങ്ങാം.

ഇത്തവണ 27 വി​ല്ലേജിൽ പവലിയനുകളുണ്ടാകുമെന്ന്​ അധികൃതർ നേരത്തെ വ്യക്​തമാക്കിയിരുന്നു. എല്ലാ തവണത്തെയും പോലെ പുതിയ ആകർഷകങ്ങളും വിനോദങ്ങളും പരിചയപ്പെടുത്തിയാണ്​ ഇത്തവണയും ആഗോള ഗ്രാമം ഒരുങ്ങുന്നത്​. ഗ്ലോബൽ വില്ലേജ് പ്രീമിയം, എമിറാത്തി ഡിസ്കവറി, പാചക പാതകൾ, ജിവി ഫുള്ളി ലോഡഡ് എന്നിവ പുതിയ സീസണിൽ അന്താരാഷ്ട്ര വിനോദസഞ്ചാരികൾക്കായി പ്രത്യേകം രൂപകൽപ്പന ചെയ്ത പാക്കേജുകളാണ്​. 2022ഒക്​ടോബർ മുതൽ 2023ഏപ്രിൽ വരെയാണ്​ 27ാമത്​ സീസൺ അരങ്ങേറുക. കഴിഞ്ഞ സീസണിൽ എത്തിയത്​ 78 ലക്ഷം സന്ദർശകരായിരുന്നു.