കാൻസർ ബാധിതനായ ഏഴുവയസുകാരന്റെ ആഗ്രഹം നിറവേറ്റി ദുബൈ പൊലീസ്
പേര് ആദം, ഏഴു വയസുകാരന്‍, ഐറിഷുകാരനാണ്, ആഢംബര കാറുകളോടാണ് പ്രിയം, ചെറുപ്രായത്തില്‍തന്നെ അര്‍ബുധ ബാധിതനായതിനാല്‍ അല്‍പം പ്രയാസത്തിലാണ്. പക്ഷെ ആഗ്രഹങ്ങള്‍ എല്ലാവര്‍ക്കുമില്ലേ..? ആഢംബര കാറുകള്‍ കാണുകയെന്നതാണ് ആദമിന്റെ ആഗ്രഹം.
ആഗ്രഹം പ്രകടിപ്പിച്ചതോ.., ജനങ്ങളുടെ സന്തോഷത്തിനും സുരക്ഷിതത്വത്തിനുമായി എന്തിനും തയാറുള്ള ദുബൈ പൊലീസിനോടും. കാന്‍സര്‍ ബാധിതനായ അനന്തരവന്റെ ആഗ്രഹം നിറവേറ്റാന്‍ ആവശ്യപ്പെട്ട് ഐറിഷ് പൗരനാണ് പൊലീസിന് മെയില്‍ അയച്ചത്.
ആ 'കുഞ്ഞു ആഗ്രഹം' നിറവേറ്റാന്‍ പൊലീസ് ഒട്ടും താമസിച്ചില്ല. ദുബൈ പൊലീസിന്റെ ആഢംബര കാറുകളുടെ ലോകത്തേക്ക് അവയുടെ അപൂര്‍വ ദൃശ്യങ്ങള്‍ കാണിച്ച് ആദമിനെ അവര്‍ കൂട്ടിക്കൊണ്ടുപോയി.
ആഢംബര സ്പോര്‍ട്സ് പട്രോളിങ് കാറുകളുടെ സവിശേഷതകളടങ്ങിയ ദൃശ്യങ്ങളാണ് അവന്റെ അമ്മാവനുമായി ചേര്‍ന്ന് വീഡിയോയിലൂടെ ആദമിനെ കാണിച്ചത്. ഇത് ആദമിന് വലിയ സന്തോഷവും ആശ്വാസവും പകര്‍ന്നതായി അമ്മാവന്‍ പറഞ്ഞു. ദുബൈ പോലീസിനോടുള്ള സന്തോഷവും വലിയ നന്ദിയും അദ്ദേഹം മറച്ചുവച്ചില്ല.
കൂടാതെ നിരവധി പോലീസ് ഡിപ്പാര്‍ട്ട്മെന്റുകളില്‍നിന്നും അന്താരാഷ്ട്ര സെലിബ്രിറ്റികളില്‍ നിന്നും ആദമിന് നിരവധി പിന്തുണാ സന്ദേശങ്ങളും ലഭിച്ചു. എല്ലാവരും ആദമിന്റെ അസുഖം വേഗത്തില്‍ സുഖപ്പെടട്ടേയെന്നാശംസിക്കുകയും ചെയ്തു.
Adjust Story Font
16
