മയക്കുമരുന്ന് പരിശോധനയുമായി സഹകരിച്ചില്ലെങ്കിൽ കടുത്ത നടപടി; മുന്നറിയിപ്പുമായി ദുബൈ പബ്ലിക്​പ്രോസിക്യൂഷൻ

ദുബൈ: മയക്കുമരുന്ന് പരിശോധനയുമായി സഹകരിച്ചില്ലെങ്കിൽ കടുത്ത നടപടിയെന്ന മുന്നറിയിപ്പുമായി ദുബൈ പബ്ലിക്​പ്രോസിക്യൂഷൻ. ​​ഉദ്യോഗസ്ഥർക്ക് ​സാമ്പിൾ നൽകാൻ വിസമ്മതിച്ചാൽ ലക്ഷം ദിർഹം പിഴയും രണ്ടു വർഷത്തിൽ കുറയാത്ത തടവുമായിരിക്കും ശിക്ഷ. മയക്കുമരുന്ന്​ ഉപയോഗ​ത്തിനെതിരെ ബോധവത്​കരണം ശക്​തമാക്കാനും അധികൃതർ തീരുമാനിച്ചു

സമൂഹ മാധ്യമമായ എക്സിലൂടെയാണ്​ പബ്ലിക്​ പ്രോസിക്യൂഷൻ മയക്കുമരുന്ന് ​വിരുദ്ധ നടപടികളിലെ ശിക്ഷ സംബന്ധിച്ച കൂടുതൽ വിവരങ്ങൾ പുറത്തുവിട്ടത്​. സാമ്പിൽ ശേഖരിക്കാൻ പബ്ലിക് ​പ്രോസിക്യൂഷൻ നിയമിക്കുന്ന ഉദ്യോഗസ്ഥരെ അനുസരിക്കണം. വ്യക്​തമായ ന്യായീകരണമില്ലാതെ ഉദ്യോഗസ്ഥരുടെ നടപടികൾ തടസ്സപ്പെടുത്തിയാൽ ഫൈനും ജയിൽശിക്ഷയും ലഭിക്കും.

പൊതുസുരക്ഷ ഉറപ്പാക്കാനുള്ള സർക്കാർ പ്രതിബദ്ധതയുടെ കൂടി ഭാഗമാണ്​ കടുത്ത നടപടിയെന്ന്​ ​ ​പബ്ലിക്​ പ്രോസിക്യൂഷൻ അറിയിച്ചു. മയക്കുമരുന്ന്​ രഹിത സമൂഹം കെട്ടിപ്പടുക്കാനും പൊതുജനങ്ങളുടെ സാമൂഹിക ക്ഷേമം ഉറപ്പവരുത്താനുമാണ്​ നിയമം കർശനമാക്കുന്നത്​​. വിദേശ രാജ്യങ്ങളിൽ നിന്ന്​ ദുബൈ മുഖേന മയക്കുമരുന്ന് ​കടത്ത് ​വ്യാപകമായ സാഹചര്യത്തിലാണ്​ നിരീക്ഷണവും നടപടിയും കടുപ്പിക്കുന്നത്​​. കഴിഞ്ഞ ഒരു മാസത്തിനിടെ കോടിക്കണക്കിന്​ വില വരുന്ന മയക്കുമരുന്നാണ്​ ദുബൈ കസ്റ്റംസ്​ പിടികൂടിയത്.