യു.എ.ഇയിൽ ഇന്ധനവില കുറച്ചു; പെട്രോളിന് 41 ഫിൽസ് കുറയും, ഡീസലിന് 15 ഫിൽസും

ദുബൈ: യു.എ.ഇയിൽ നാളെ മുതൽ ഇന്ധനവില കുറയും. പെട്രോൾ ലിറ്ററിന് 41 ഫിൽസും ഡീസലിന് 15 ഫിൽസുമാണ് കുറയുക. ഇന്ധനവില കുറഞ്ഞതോടെ വിവിധ എമിറേറ്റുകളിൽ ടാക്സി നിരക്കും കുറച്ചു.

നാലു മാസത്തെ തുടര്‍ച്ചയായ വില വര്‍ധിക്കുന്ന പ്രവണതക്ക് ശേഷമാണ് യു എ ഇയിൽ ഇന്ധനവില കുറയുന്നത്. നവംബർ ഒന്ന് മുതലാണ് പുതുക്കിയ നിരക്ക് നിലവിൽ വരിക. 3 ദിർഹം 44 ഫിൽസ് വിലയുണ്ടായിരുന്ന സൂപ്പര്‍ പെട്രോളിന് 3 ദിർഹം 03 ഫിൽസ് നല്‍കിയാല്‍ മതി. സ്പെഷ്യൽ പെട്രോളിന്റെ വില 3 ദിർഹം 33 ഫിൽസിൽ നിന്ന് 2 ദിർഹം 92 ഫിൽസായി കുറയും. ഇപ്ലസ് പെട്രോളിന്റെ വില 3 ദിർഹം 26 ഫിൽസിൽ നിന്ന് 2 ദിർഹം 85 ഫിൽസായി.

3 ദിർഹം 42 ഫിൽസാണ് ഡീസലിന്റെ പുതിയ വില. ഒക്ടോബറില്‍ ഇത് 3 ദിർഹം 57 ഫിൽസായിരുന്നു. ഇന്ധവില കുറയുന്നതോടെ നാളെ മുതൽ അജ്മാനിലെ ടാക്സി നിരക്ക് കിലോമീറ്ററിന് ഒരു ദിർഹം 83 ഫിൽസായി കുറച്ചതായി അജ്മാൻ ട്രാൻസ്പോർട്ട് അതോറിറ്റി അറിയിച്ചു.