ഗസ്സ വെടിനിർത്തൽ പ്രമേയം: സ്വാഗതം ചെയ്ത്​ യു.എ.ഇ

അബൂദബി: റമദാൻ മാസത്തിൽ ഗസ്സയിൽ അടിയന്തിരമായി വെടിനിർത്തൽ നടപ്പാക്കണമെന്ന ഐക്യരാഷ്ട്ര സഭ പ്രമേയത്തെ സ്വാഗതം ചെയ്ത്​ യു.എ.ഇ. പ്രമേയം നടപ്പാക്കുന്നത്​ ഗസ്സയിൽ സ്ഥിരം വെടിനിർത്തലിലേക്ക്​ നയിക്കുമെന്നും വിദേശകാര്യ മന്ത്രാലയം പ്രതീക്ഷ പ്രകടിപ്പിച്ചു.

പ്രതിസന്ധി അവസാനിപ്പിക്കാനും ഫലസ്തീൻ ജനതക്ക്​ കൂടുതൽ ദുരിതം ഉണ്ടാകുന്നത് തടയാനും പ്രമേയം സഹായകമാകുമെന്നാണ്​ കരുതുന്നതെന്ന്​ യു.എ.ഇ പ്രസ്​താവനയിൽ ചൂണ്ടിക്കാട്ടി. ഇതിനു പുറമെ തടസ്സമില്ലാതെ എളുപ്പത്തിൽ ദുരിതാശ്വാസ സഹായമെത്തിക്കാനും ബന്ദികളുടെ മോചനവും പ്രമേയം സാധ്യമാക്കുമെന്നും​ പ്രത്യാശിക്കുന്നു.

സ്വതന്ത്ര ഫലസ്തീൻ രാഷ്ട്രം സ്ഥാപിക്കാൻ​ ദ്വിരാഷ്ട്ര പരിഹാര ചർച്ചകളിലേക്ക്​ മടങ്ങണമെന്നും യു.എ.ഇ ആവശ്യപ്പെട്ടു. ഗസ്സയിലെ മാനുഷിക ദുരന്തം കുറക്കുന്നതിന്​ വിവിധ പങ്കാളികളുമായി സഹകരിച്ച്​ യു.എ.ഇ പ്രവർത്തനം തുടരുമെന്നും മന്ത്രാലയം വ്യക്​തമാക്കി.

അതിനിടെ, വടക്കൻ ഗസ്സയിലേക്ക്​ കൂടുതൽ സഹായം അയച്ച്​ യു.എ.ഇ. ജോർദാനുമായി ചേർന്ന്​ പുതുതായി 22 ടൺ ഭക്ഷ്യോൽപന്നങ്ങളും മറ്റും വടക്കൻ ഗസ്സയിൽ എയർഡ്രോപ്പ്​ ചെയ്​തു. യു.എ.ഇ പ്രസിഡൻറ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാൻ രൂപം നൽകിയ ഗാലൻറ്​ നൈറ്റ്​ ത്രി പദ്ധതിയുടെ ഭാഗമായാണ്​ ഗസ്സയിലേക്കുള്ള യു.എ.ഇ സഹായ പദ്ധതികൾ നടപ്പാക്കി വരുന്നത്​.