ഇന്ത്യ, ജി.സി.സി സ്വതന്ത്ര വാണിജ്യ കരാർ വൈകില്ല; വാർഷിക വ്യാപാരം ഉയർത്താനും ധാരണ

ദുബൈ: ഇന്ത്യയും ജി.സി.സി രാജ്യങ്ങളും തമ്മിലെ സ്വതന്ത്ര വാണിജ്യ കരാർ ഉടൻ യാഥാർഥ്യമാക്കാൻ ഇരുകൂട്ടർക്കും ഇടയിൽ ധാരണ. വാർഷിക വ്യാപാരം 154 ബില്യൻ ഡോളറിനു മുകളിലേക്ക്​ ഉയർത്താനും തീരുമാനമായി. യു.എ.ഇയുമായി ​രൂപപ്പെടുത്തിയ സമഗ്ര സാമ്പത്തിക കരാർ വിപുലപ്പെടുത്തുന്ന കാര്യവും പരിഗണനയിലാണ്​.

കഴിഞ്ഞ ദിവസം സൗദി തലസ്​ഥാനമായ റിയാദിൽ ചേർന്ന പ്രഥമ ഇന്ത്യ, ജി.സി.സി ഉന്നതതല ഉദ്യോഗസ്​ഥരുടെ യോഗമാണ്​ഇക്കാര്യങ്ങൾ ചർച്ച ചെയ്​തതെന്ന്​ യു.എ.ഇ വിദേശകാര്യ മന്ത്രാലയം അറിയിച്ചു. കേന്ദ്ര വിദേശകാര്യ മന്ത്രാലയത്തിലെ ഗൾഫ്​ ചുമതലയുള്ള സെക്രട്ടറി ഡോ, ഔസാഫ്​ സഈദാണ്​ ഇന്ത്യൻ സംഘത്തെ നയിച്ചത്​. രാഷ്​ട്രീയകാര്യ അസി. സെക്രട്ടറിജനറൽ ഡോ. അബ്​ദുൽ അസീസ്​ ബിൻ ഹമദ്​ അൽ ഉവൈസാക്​ ജി.സി.സി സംഘത്തിനും നേതൃത്വം നൽകി.

ഉഭയകക്ഷി വാണിജ്യ വികസനവുമായി ബന്​ധപ്പെട്ട്​ കൂടിയാലോചനാ പ്രക്രിയ സംബന്​ധിച്ച്​ ഇരുപക്ഷവും ധാരണാപത്രത്തിൽ ഒപ്പുവെച്ചു. നേരത്തെ കേന്ദ്ര വിദേശകാര്യ മന്ത്രി ഡോ. എസ്​ ജയശങ്കറിന്റെ റിയാദ്​ സന്ദർശനവേളയിൽ ​കൈ​ക്കൊണ്ട തീരുമാനങ്ങൾ ത്വരിതഗതിയിലാക്കും. സ്വതന്ത്ര വ്യാപാര കരാർ അധികം വൈകാതെ യാഥാർഥ്യമാക്കാനാകുമെന്ന്​ ഇന്ത്യയും ജി.സി്.സി രാജ്യങ്ങളും പ്രതീക്ഷ പ്രകടിപ്പിച്ചു.

ഇന്ത്യയിലേക്കും ഗൾഫിലേക്കുമുള്ള വാണിജ്യവും നിക്ഷേപവും വർധിപ്പിക്കാൻ കരാർ വഴിയൊരുക്കുമെന്നാണ്​പ്രതീക്ഷ. പാര​മ്പര്യേതര ഊർജം, ഭക്ഷ്യസുരക്ഷ, ആരോഗ്യം, വിവര സാ​​ങ്കേതികത എന്നീ മേഖലകളിലെ പങ്കാളിത്തം സംബന്​ധിച്ച കാര്യങ്ങൾ തീരുമാനിക്കാൻ സംയുക്​ത വർക്കിങ്​ ഗ്രൂപ്പുകൾക്ക്​ രൂപം നൽകും. കഴിഞ്ഞ സാമ്പത്തിക വർഷം 154 ബില്യൻ വ്യാപാരമെന്ന ലക്ഷ്യം നേടാൻ സാധിച്ചതി​െൻറ സംതൃപ്​തിയിലാണ്​ ഇന്ത്യയും ജി.സി.സി രാജ്യങ്ങളും. വരും വർഷങ്ങളിൽ വ്യാപാരവർധന ഉറപ്പാണെന്നും യോഗം വിലയിരുത്തി.