സഹകരണം ശക്​തമാക്കാനുറച്ച്​ ഇറാനും യു.എ.ഇയും; ഇറാൻ വിദേശകാര്യ മന്ത്രിയുമായി യു.എ.ഇ പ്രസിഡൻറ്​ ചർച്ച നടത്തി

പരസ്​പര ബന്​ധം ഊട്ടിയുറപ്പിക്കാൻ യു.എ.ഇയും ഇറാനും തമ്മിൽ ധാരണ. അബൂദബിയിലെത്തിയ ഇറാൻ വിദേശകാര്യ മന്ത്രി ഹുസൈൻ അമിറബ്​ദുല്ലാഹിയാൻ, യു.എ.ഇ പ്രസിഡൻറ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാനുമായി കൂടിക്കാഴ്​ച നടത്തി. ഗൾഫ്​ മേഖലയുടെ സുരക്ഷ ഉൾപ്പെടെ വിവിധ വിഷയങ്ങൾ ചർച്ചയായി.

അബൂദബി അൽ ശാത്തി കൊട്ടാരത്തിൽ ആയിരുന്നു ശൈഖ്​ മുഹമ്മദ്​ ബിൻ സായിദും ഇറാൻ വിദേശകാര്യ മന്ത്രിയും തമ്മിലെ കൂടിക്കാഴ്​ച. സാമ്പത്തികം ഉൾപ്പെടെ വിവിധ വിഷയങ്ങളിൽ ഏകോപനം വിപുലപ്പെടുത്താൻ ഇരുരാജ്യങ്ങളും ധാരണയിലെത്തി. ഗൾഫ്​ മേഖലയുടെ സുരക്ഷക്കും കെട്ടുറപ്പിനും പരോഗതിക്കും ഗുണകരമാകുമാറുള്ള അനുകൂല കാര്യങ്ങൾ ചർച്ചയിൽ രൂപപ്പെട്ടതായി ഔദ്യോഗിക വാർത്താ ഏജൻസി റിപ്പോർട്ട്​ ചെയ്​തു.

ഇറാൻ പ്രസിഡൻറ്​ ഇബ്രാഹിം അൽ റഈസിയുടെ ഭാവുകങ്ങൾ യു.എ.ഇ നേതാക്കൾക്ക്​ ഹുസൈൻ അമിറബ്​ദുല്ലാഹിയാൻ കൈമാറി. ഇറാൻ നേതാക്ക​ൾക്ക്​ യു.എ.ഇ പ്രസിഡൻറും ആശംസ കൈമാറി. ശൈഖ്​ മൻസൂർ ബിൻ സായിദ്​, ശൈഖ്​ അബ്​ദുല്ല ബിൻ സായിദ്​, ശൈഖ്​ ഹംദാൻ ബിൻ മുഹമ്മദ്​, അലി അൽ ശംഷി, ഖലീഫ അൽ മറാർ, സൈഫ്​ അൽ ശഅബി എന്നിവരും ചർച്ചയിൽ സംബന്​ധിച്ചു. യു.എ.ഇ ഉൾപ്പെടെ ഗൾഫ്​ രാജ്യങ്ങളിലെ പര്യടന ഭാഗമായാണ്​ ഇറാൻ വിദേശകാര്യ മന്ത്രിയുടെ സന്ദർശനം. സൗദി അറേബ്യ ഉൾപ്പെടെ ഗൾഫ്​ രാജ്യങ്ങളുമായി ഭിന്നതകൾ മറന്ന്​ സഹകരിക്കുമെന്ന്​ ഇറാൻ നേതൃത്വം വ്യക്​തമാക്കിയിരുന്നു.