വെടിനിർത്തൽ ചർച്ച പുനരാരംഭിക്കുമെന്ന് ഇസ്രായേൽ; കൊടുംക്രൂരതകൾക്ക്​ മറയിടാനുള്ള തന്ത്രം മാത്രമെന്ന് ഹമാസ്

ദുബൈ: വെടിനിർത്തൽ കരാർ ചർച്ച പുനരാരംഭിക്കുമെന്ന്​ ഇസ്രായേൽ പ്രധാനമന്ത്രി നെതന്യാഹുവിന്റെ ഓഫിസ്.​ മൊസാദ്​, സി.ഐ.എ മേധാവികൾ ചർച്ച നടത്തിയിട്ടുണ്ട്.

ഭിന്നത കുറച്ചു കൊണ്ടുവരികയെന്ന ലക്ഷ്യത്തോടെയാണ്​ വീണ്ടും വെടിനിർത്തൽ കരാർ ചർച്ചയെന്ന്​ ഇസ്രായേൽ പ്രധാനമന്ത്രി നെതന്യാഹുവി​െൻറ ഓഫിസ്​ അറിയിച്ചു. മധ്യസ്​ഥ രാജ്യങ്ങളായ ഖത്തറും ഈജിപ്​തുമായി ആശയവിനിമയം തുടരുകയാണ്​.

റമദാനിൽ ഗസ്സയിലെ ഫലസ്​തീനികളുടെ ചെലവിൽ സ്​ഥിതിഗതികൾ സങ്കീർണമാക്കാനാണ്​ ഹമാസ്​ നീക്കമെന്നും നെതന്യാഹുവി​ന്റെ ഓഫിസ്​ കുറ്റപ്പെടുത്തി. വെടിനിർത്തൽ ആവശ്യമില്ലെന്ന നിലപാടാണ്​ ഹമാസിന്റേതെന്നും ഇസ്രായേൽ ആരോപിച്ചു.

എന്നാൽ, കൊടുംക്രൂരതകൾക്ക്​ മറയിടാനുള്ള തന്ത്രം മാത്രമായാണ്​ വെടിനിർത്തൽ ചർച്ചയെ ഇസ്രായേൽ നോക്കി കാണുന്നതെന്നും സമ്പൂർണ വെടിനിർത്തലാണ്​ അനിവാര്യമെന്നും ഹമാസ്​ പ്രതികരിച്ചു. ഇസ്രായേൽ തുടരുന്ന വംശഹത്യയെ പ്രതിരോധിക്കാൻ അന്തർദേശീയ തലത്തിൽ മികച്ച നയതന്ത്ര, രാഷ്​ട്രീയ, നിയമ മാർഗങ്ങൾ സ്വീകരിക്കാൻ അറബ്​ മുസ്​ലിം ലോകം തയാറാകണമെന്ന്​ ഹമാസ്​ നേതാവ്​ ഇസ്​മാഈൽ ഹനിയ്യ പറഞ്ഞു.

ഗസ്സ തീരത്ത്​ താൽക്കാലിക തുറമുഖം നിർമിച്ച്​ സഹായം ലഭ്യമാക്കാനുള്ള അമേരിക്കൻ നീക്കത്തെ ഹമാസ്​ സ്വാഗതം ചെയ്​തു. എന്നാൽ, റഫ ഉൾപ്പെടെ അതിർത്തി മാർഗം ഗസ്സയിൽ സഹായം എത്തിക്കാൻ ഇസ്രായേലിനെ നിർബന്​ധിക്കുകയാണ്​ അമേരിക്ക ചെയ്യേണ്ടതെന്നും ഹമാസ്​ പ്രതികരിച്ചു.

ഇന്നലെ ഗസ്സയിൽ ഇസ്രായേൽ നടത്തിയ ആക്രമണത്തിൽ 82 പേർ കൂടി കൊല്ലപ്പെട്ടു. വടക്കൻ ഗസ്സയിൽ സഹായം എത്തിക്കാനുള്ള നടപടി ഇനിയും വിജയം കണ്ടില്ല. ഇന്നലെയും വടക്കൻ ഗസ്സയിൽ വിമാനത്തിൽ ഭക്ഷ്യപാക്കറ്റുകൾ അമേരിക്ക എയർഡ്രോപ്പ്​ ചെയ്​തിട്ടുണ്ട്.

ഗസ്സയിൽ സഹായമെത്തിക്കാൻ എളുപ്പ വഴി റോഡാണെന്ന് ഫലസ്തീനായി പ്രവർത്തിക്കുന്ന യു.എൻ ഏജൻസി യു.എൻ.ആർ.ഡബ്ല്യു.എ വ്യക്തമാക്കി. സഹായം എത്തിക്കാനുള്ള ലളിതവും കാര്യക്ഷമവുമായ റോഡ് മാർഗത്തെ ഉപേക്ഷിച്ച് എയർഡ്രോപ്പിലും സമുദ്ര ഇടനാഴികളിലും ശ്രദ്ധ കേന്ദ്രീകരിക്കുന്ന രീതി യാഥാർഥ്യബോധത്തോടെയുള്ളതല്ലെന്ന്​ യു.എൻ.ആർ.ഡബ്ല്യു.എ വക്താവ് ജൂലിയറ്റ് ടൂമ പറഞ്ഞു.

വെള്ളിയാഴ്​ച എയർ ഡ്രോപ്പിനിടെ ഭക്ഷ്യചാക്കുകൾ തലയിൽ വീണ് ആറു പേർ മരിക്കുകയുണ്ടായി. റമദാൻ ആസന്നമായതോടെ വെസ്​റ്റ്​ ബാങ്കിലെ മസ്​ജിദുൽ അഖ്​സയിൽ ഫലസ്​തീനികൾക്ക്​ നിയന്ത്രണം ഏർപ്പെടുത്തണമെന്നാവശ്യപ്പെട്ട്​ മന്ത്രി ബെൻഗവിർ രംഗത്തുവന്നു. അടിയന്തര യുദ്ധകാര്യ മന്ത്രിസഭ ഉടൻ യോഗം ചേരണമെന്നും ബെൻ ഗവിർ ആവശ്യപ്പെട്ടു.

ചെങ്കടലിൽ അമേരിക്കൻ യുദ്ധകപ്പലിനു നേർക്ക്​ ആക്രമണം നടത്തിയെന്ന്​ ഹൂതികൾ ഇന്നലെ അവകാശപ്പെട്ടിരുന്നു. എന്നാൽ, കപ്പലുകൾ സുരക്ഷിതമാണെന്ന്​ യു.എസ്​ സെൻ​ട്രൽ കമാൻറ്​ അറിയിച്ചു. ഹൂതി കേന്ദ്രങ്ങളിൽ നടത്തിയ ആക്രമണത്തിൽ നിരവധി ഡ്രോണുകൾ തകർത്തതായും അമേരിക്ക വ്യക്​തമാക്കി. വടക്കൻ ഗസ്സയിലേക്ക്​ സഹായവുമായി സൈപ്രസിൽ നിന്നുള്ള കപ്പൽ ഈ ആഴ്​ച പുറപ്പെടും.