കൊലപാതകം: ഇസ്രായേൽ പൗരൻമാർക്കെതിരെ നിയമ നടപടി തുടരുന്നു; പേരുകൾ പുറത്തുവിട്ടു

ദുബൈ: കൊലപാതകക്കേസിൽ അറസ്റ്റിലായ എട്ട് ​ഇസ്രായേൽ പൗരൻമാർക്കെതിരെ നിയമ നടപടി തുടരുന്നു. കുറ്റകൃത്യത്തിൽ ഉൾപ്പെട്ട എട്ടു പേരുടെയും പേരുവിവരങ്ങൾ ദുബൈ പൊലീസ് ​പുറത്തുവിട്ടു.

ഹസാൻ യജോരി, സമേഹ്​ റോബായി, സലിം റാബിഹ, മഹമോദ് ​റാബിഹ, താൽ സിസ്​ലർ, റാണി ഖ്യുവൈഷ്​, അബ്​ദുല്ല ജോഹർ, മഹമോദ്​ അൽ ​ഷെയ്ഖ്​ എന്നിവരാണ് ​അറസ്റ്റിലായത്​. ഇസ്രായേൽ പൗരനായ ഗസ്സാൻ ശാംസി (33) ആണ്​ കൊല്ലപ്പെട്ടത്​. രണ്ട്​ കുടുംബങ്ങൾ തമ്മിൽ ഇസ്രായേലിൽ നടന്ന തർക്കം 24കാരനായ യുവാവിന്റെ കൊലപാതകത്തിൽ കലാശിക്കുകയായിരുന്നു.

ഇതിന്റെ പ്രതികാര​മെന്ന നിലയിലാണ് ​ഗസ്സാൻ ശാംസിയെ പ്രതികൾ വധിച്ചതെന്നാണ്​ സംശയിക്കുന്നതെന്ന്​ ദുബൈ ​പൊലീസ്​ അറിയിച്ചു. സംഭവം നടന്ന്​ 24 മണിക്കൂറിനകം മുഴുവൻ പ്രതികളേയും പ്രതികൂടാൻ കഴിഞ്ഞത്​ ദുബൈ പൊലീസിന്റെ മികവായി മാറി.

എമിറേറ്റിലെ ജനങ്ങൾക്ക് ​ഉയർന്ന നിലവാരത്തിലുള്ള സുരക്ഷ ഉറപ്പുവരുത്താനും ഇരകർക്ക് ​നീതി ലഭ്യമാക്കാനും സേന പ്രതിജ്ഞാബദ്ധമാണെന്ന്​ ദുബൈ പൊലീസ്​ കമാൻഡർ ഇൻ ചീഫ്​ ലഫ്​റ്റനന്റ് ​ജനറൽ അബ്​ദുല്ല ഖലീഫ അൽ മർറി പറഞ്ഞു.