ഇസ്രായേൽ ആക്രമണം: ഗസ്സയിൽ നിന്ന് പരിക്കേറ്റ കൂടുതൽ പേരെ അബൂദബിയിൽ എത്തിച്ചു

അബൂദബി: ഇസ്രായേൽ ആക്രമണത്തി‌ൽ പരിക്കേറ്റവരും കാൻസർ രോഗികളുമായി ഗസ്സയിൽ നിന്നുള്ള ആറാമത് വിമാനം അബൂദബിയിലെത്തി. അടിയന്തര ചികിത്സ ആവശ്യമുള്ള 61കുട്ടികളും കുടുംബാംഗങ്ങളും സംഘത്തിലുണ്ട്​. യു.എ.ഇ പ്രസിഡന്‍റ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്‌യാന്റെ നിർദേശത്തെ തുടർന്നാണ്​ ചികിത്സ ആവശ്യമുള്ളവരെ രാജ്യത്ത് ​എത്തിക്കുന്ന പദ്ധതി ആവിഷ്കരിച്ചത്​.

പരിക്കേറ്റ 1000 കുട്ടികളെയും 1000 കാൻസർ രോഗികളെയും ഗസ്സയിൽ നിന്ന്​ എത്തിച്ച്​ യു.എ.ഇ ആശുപത്രികളിൽ ചികിത്സിക്കാനാണ്​ പ്രസിഡന്‍റ്​ പ്രഖ്യാപിച്ചത്​. ഗസ്സയുടെ സമീപ പ്രദേശമായ ഈജിപ്തിലെ അൽ ആരിഷ്​ വിമാനത്താവളം വഴിയാണ്​ സംഘത്തെ അബൂദബിയിലെത്തിച്ചത്​. കുട്ടികൾക്കൊപ്പം 71കുടുംബാഗങ്ങളും അബൂദബിയിലെത്തി​.

നേരത്തെ എത്തിയ അഞ്ച് ബാച്ചുകളിലെ കുട്ടികളുടെയും മറ്റു രോഗികളുടെയും ചികിത്സ വിവിധ ആശുപത്രികളിൽ പുരോഗമിക്കുകയാണ്​. ആക്രമണം ആരംഭിച്ച ഒക്​ടോബർ മുതൽ ഗസ്സയിലെ ജനങ്ങളെ സഹായിക്കുന്നതിനായി വിവിധ പദ്ധതികൾ യു.എ.ഇ നടപ്പാക്കി വരുന്നുണ്ട്​. ഇതിനകം 131 വിമാനങ്ങളിലായി 14,000 ടൺ ഭക്ഷണവും മെഡിക്കൽ, റിലീഫ്​ വസ്തുക്കളും അടക്കം ഗസ്സയിലേക്ക്​ എത്തിച്ചു​.

'ഗാലന്റ്​ നൈറ്റ് ​3' എന്നു പേരിട്ട ജീവകാരുണ്യ ഓപറേഷന്‍റെ ഭാഗമായി ഗസ്സയിൽ ഫീൽഡ് ആശുപത്രിയും കടൽവെള്ള ശുദ്ധീകരണ പ്ലാന്‍റുകളും ഒരുക്കിയിട്ടുമുണ്ട്​. യു.എ.ഇ ഫീൽഡ്​ ആശുപത്രിയിലേക്ക് ​ഒമ്പതംഗ മെഡിക്കൽ വളണ്ടിയർമാരുടെ സംഘം കഴിഞ്ഞദിവസം പുറപ്പെട്ടിരുന്നു. ആരോഗ്യ സേവനരംഗത്ത് ​താൽപര്യമുള്ളവരുടെ മൂന്നാമത്​ ബാച്ചാണ്​ തിങ്കളാഴ്ച ഗസ്സയിലെത്തിയത്​.