തുർക്കിയയുമായി സമഗ്ര സാമ്പത്തിക പങ്കാളിത്ത കരാർ ഒപ്പുവെച്ച്​ യു.എ.ഇ

ഇന്ത്യക്ക്​ പിന്നാലെ തുർക്കിയയുമായി സമഗ്ര സാമ്പത്തിക പങ്കാളിത്ത കരാർ ഒപ്പുവെച്ച്​ യു.എ.ഇ. യു.എ.ഇ സാമ്പത്തികകാര്യ മന്ത്രി അബ്​ദുല്ല മിൻ തൗഖ്​ അൽ മർറി, തുർക്കിയ വ്യാപാര മന്ത്രി മെഹ്​മത്​ മസ്​ എന്നിവരാണ്​ കരാറിൽ ഒപ്പിട്ടത്​. യു.എ.ഇ സെപ കരാർ ഒപ്പുവെക്കുന്ന നാലാമത്തെ രാജ്യമാണ്​ തുർക്കി. യു.എ.ഇ പ്രസിഡന്‍റ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാനെയും തുർക്കിയ പ്രസിഡന്‍റ്​ റജബ്​ ത്വയ്യിബ്​ ഉർദുഗാനെയും ഓൺലൈനിൽ സാക്ഷി നിർത്തിയാണ്​ ഇരു രാജ്യങ്ങളും​ കരാറിൽ ഒപ്പുവെച്ചത്​.

ആദ്യം ഇന്ത്യയുമായി ഒപ്പുവെച്ച യു.എ.ഇ പിന്നീട്​ ഇസ്രായേൽ, ഇന്തോനേഷ്യ എന്നീ രാജ്യങ്ങളുമായി കരാറിലേർപെട്ടിരുന്നു. എണ്ണയിതര വ്യാപാരത്തിലെ വർധനവ്​ ലക്ഷ്യമിട്ടാണ്​ യു.എ.ഇ-തുർക്കി കരാർ. 82 ശതമാനം സാധനങ്ങളുടെയും കസ്റ്റംസ്​ തിരുവയിൽ കുറവ്​ വരുമെന്നതാണ്​ കരാറിന്‍റെ പ്രത്യേകത. ഇതിൽ 93 ശതമാനവും എണ്ണയിതര മേഖലയിലാണ്​. ഇതോടെ, ഇരുരാജ്യങ്ങളിലെയും ഇറക്കുമതിയും കയറ്റുമതിയും വർധിക്കും.

യു.എ.ഇയിൽ നിന്നുള്ള കയറ്റുമതിക്കാർക്ക്​ തുർക്കിയയിലേക്ക്​ കൂടുതൽ സാധനങ്ങൾ കുറഞ്ഞ ചിലവിൽ ഇറക്കുമതി ചെയ്യാൻ കഴിയും. നിർമാണ മേഖലക്കാണ്​ ഇത്​ ഏറ്റവും കൂടുതൽ ഉപകാരപ്പെടുക. എണ്ണയിതര മേഖലയിലെ വ്യാപാരം അടുത്ത അഞ്ച്​ വർഷത്തിനുള്ളിൽ 40 ശതകോടി ഡോളറാക്കുക എന്നതാണ്​ ലക്ഷ്യം. 2031ഓടെ 25,000 പുതിയ തൊഴിൽ സൃഷ്ടിക്കാനും ലക്ഷ്യമിടുന്നു. കരാർ പ്രാബല്യത്തിലാകുന്നതോടെ യു.എ.ഇയിൽ നിന്ന്​ തുർക്കിയയിലേക്കുള്ള കയറ്റുമതിയിൽ 21.7 ശതമാനം വർധനവുണ്ടാകുമെന്നാണ്​ കരുതുന്നത്​. തുർക്കിയിലേക്കുള്ള എണ്ണയിതര കയറ്റുമതി കഴിഞ്ഞ വർഷം 5.6 ശതകോടി ഡോളറായിരുന്നു. 2021നെ ​അപേക്ഷിച്ച്​ 109 ശതമാനം വളർച്ചയാണ്​ ഇക്കാര്യത്തിലുണ്ടായത്​. സെപ യാഥാർഥ്യമാകുന്നതോടെ ഇത്​ ഇനിയും കുതിച്ചുയരും.