സൗദി-ഇറാൻ നയതന്ത്ര ബന്ധം: തീരുമാനത്തിന്​ വ്യാപക പിന്തുണ, ഗൾഫ്​ സുരക്ഷക്ക്​ തുടർ ചർച്ച വേണമെന്ന്​ യു.എൻ

നയതന്ത്ര ബന്ധം പുന:സ്ഥാപിക്കാനുള്ള ഇറാൻ, സൗദി തീരുമാനത്തെ യുഎന്നും ലോകരാജ്യങ്ങളും പിന്തുണച്ചു. യെമൻ യുദ്ധത്തിന്​ അറുതി വരുത്താൻ ഇറാൻ, സൗദി ധാരണ വഴിയൊരുക്കുമെന്നാണ് ലോക രാജ്യങ്ങളുടെ പ്രതീക്ഷ. അതേ സമയം കരാറിനെ വിമർശിച്ച്​ ഇസ്രായേൽ രംഗത്തു വന്നു

ഏഴു വർഷത്തെ അകൽച്ചക്കൊടുവിൽ കൈകോർക്കാനുള്ള ഇറാൻ, സൗദി തീരുമാനം മേഖലയുടെ സുരക്ഷയിൽ ഗുണപരമായ മാറ്റം കൊണ്ടുവരുമെന്ന്​ യു.എൻ സെക്രട്ടറി ജനറൽ അഭിപ്രായപ്പെട്ടു. മധ്യസ്​ഥ ചർച്ചക്ക്​ വേദിയൊരുക്കിയ ചൈനീസ്​ ഭരണകൂടത്തെ യു.എൻ അഭിനന്ദിക്കുകയും ചെയ്​തു. ഗൾഫിന്റെ സുരക്ഷക്ക്​ തീരുമാനം ഏറെ മുതൽക്കൂട്ടാകും.

ഗൾഫ്​ സുരക്ഷയും സുസ്​ഥിരതയും മുൻനിർത്തി തുടർ ചർച്ചകൾ ആവശ്യമാണെന്നും യു.എൻ നേതൃത്വം വ്യക്​തമാക്കി. ഗൾഫ്​ മേഖലയുടെ സുരക്ഷയുമായി ബന്​ധപ്പെട്ട സുപ്രധാന തീരുമാനമാണിതെന്ന്​ വിവിധ യൂറോപ്യൻ യൂനിയൻ രാജ്യങ്ങൾ പ്രതികരിച്ചു. നയതന്ത്ര ബന്​ധം പുന:സ്​ഥാപിക്കാനുള്ള ഇറാൻ സൗദി നീക്കത്തെ യു.എ.ഇ ഉൾപ്പെടെ എല്ലാ ഗൾഫ്​ രാജ്യങ്ങളും അഭിനന്ദിച്ചു. ആഭ്യന്തര കാര്യങ്ങളിൽ ഇടപെടില്ലെന്ന കരാർ വ്യവസ്​ഥ പാലിക്കാൻ ഇറാൻ തയാറാകുമെന്ന പ്രത്യാശയും ജി.സി.സി രാജ്യങ്ങൾ പ്രകടിപ്പിച്ചു.

തീരുമാനം സുപ്രധാന നീക്കമാണെന്ന്​ തുർക്കി പ്രസിഡൻറ്​ ഉർദുഗാൻ പ്രതികരിച്ചു അറബ്​ ലീഗ്​, ഒഐ.സി ഉൾപ്പെടെയുള്ള കൂട്ടായ്​മകളും ഇറാൻ, സൗദി തീരുമാനത്തെ ചരിത്രപരമെന്ന്​ വിലയിരുത്തി. ഇറാൻ, സൗദി ധാരണ ഗൾഫ്​ സുരക്ഷക്ക്​ ഗുണം ചെയ്യില്ലെന്ന്​ ഇസ്രായേൽ കുറ്റപ്പെടുത്തി. അറബ്​ രാജ്യങ്ങളുമായി നയതന്ത്ര ബന്​ധം സ്​ഥാപിക്കാനുള്ള ഇസ്രായേൽ നീക്കത്തെ ഇതു ബാധിക്കാനിടയില്ലെന്നും നേതൃത്വം വ്യക്​തമാക്കി.