ഡ്രൈവറില്ലാ വാഹന മത്സരം; അന്തിമപട്ടികയിൽ 10 സ്ഥാപനങ്ങൾ

ഡ്രൈവറില്ല വാഹന വികസനത്തിനായി ദുബൈ സംഘടിപ്പിക്കുന്ന, സെൽഫ് ഡ്രൈവിങ് ട്രാൻസ്പോർട്ട് വേൾഡ് ചലഞ്ചിന്​ മികച്ച പ്രതികരണം. അവസാന റൗണ്ടിൽ ഇടം പിടിച്ചത് 10 സ്ഥാപനങ്ങൾ. 'സ്വയം പ്രവർത്തിക്കുന്ന ബസുകൾ' എന്ന തീമിലാണ്​​ഇത്തവണത്തെ മൽസരങ്ങൾ.

അപകടവും തടസ്സങ്ങളും മുൻകൂട്ടി കണ്ട് സ്വയം ഓടുന്ന ബസുകൾ നിർമിക്കുന്ന മുൻനിര സ്ഥാപനങ്ങളും യു.എ.ഇയിലെ ഗവേഷണ വിദ്യാഭ്യാസ സ്ഥാപനങ്ങളുമാണ് ചലഞ്ചിൽ മാറ്റുരച്ചത്​. 23 ലക്ഷം ഡോളറാണ് വിജയികൾക്ക്​ ലഭിക്കുന്ന സമ്മാനത്തുക. ഇതിൽ 20 ലക്ഷം ഡോളർ സ്ഥാപനങ്ങൾക്കും, മൂന്ന് ലക്ഷം ഡോളർ ഗവേഷണ വിദ്യാഭ്യാസ സ്ഥാപനങ്ങൾക്കുമാണ്​.

ദുബൈ ആതിഥ്യമരുളുന്ന സെൽഫ് ഡ്രൈവിങ് ട്രാൻപോർട്ട് വേൾഡ് കോൺഗ്രസിൽ ​ഈ മാസം 26നാണ് ​മത്സര വിജയികളെ പ്രഖ്യാപിക്കുക. ദുബൈ വേൾഡ്​ട്രേഡ്​സെൻറിൽ 26,27 തിയ്യതികളിലാണ് ​കോൺഗ്രസ്. ​ഡോ. സ്​റ്റീവൻ ഷ്ലാഡോവറാണ്​ ജഡ്ജിങ് ​പാനലിനെ നയിക്കുക​. യു.കെ, ഈജിപ്ത്​, ചൈന, ഫ്രാൻസ്​, തായ്​വാൻ എന്നീ രാജ്യങ്ങളിൽ നിന്നുള്ള കമ്പനികളാണ്​ മത്സരത്തിന്‍റെ അവസാന റൗണ്ടിൽ ഇടംപിടിച്ചത്​. ദുബൈയിലെ വിവിധ സർവകലാശാലകൾ ലോക്കൽ അക്കാദമിയ വിഭാഗത്തിലും ഇടം നേടി.

27 സ്ഥാപനങ്ങൾ രണ്ടു കാറ്റഗറിയിലായി ചലഞ്ചിന് മുന്നോട്ടു വന്നതായി ആർ.ടി.എ അധികൃതർ നേരത്തെ അറിയിച്ചിരുന്നു. ഇവരിൽ നിന്നാണ്​ 10 സ്ഥാപനത്തെ ഫൈനലിലേക്ക്​ തെരഞ്ഞെടുത്തത്​. മുൻ വർഷത്തേക്കാൾ ഇക്കുറി മത്സരാർഥികളുടെ എണ്ണം 130 ശതമാനം വർധിച്ചിട്ടുണ്ട്. മൊത്തം വാഹനങ്ങളുടെ 25 ശതമാനം സ്വയം നിയന്ത്രിത വാഹനങ്ങളാക്കാനുള്ള ദുബൈയുടെ ലക്ഷ്യത്തിന്റെ ഭാഗമാണ് ഈ ചലഞ്ച്.