ഗസ്സയില്‍ അടിയന്തര സഹായം ഉറപ്പാക്കാന്‍ ഇടപെടൽ ശക്തമാക്കി യു.എ.ഇ

ദുബൈ: ഗസ്സയിലേക്ക്​ അടിയന്തര സഹായം ഉറപ്പാക്കാന്‍ നീക്കവുമായി യു.എ.ഇ നേതൃത്വം. സംഘർഷം അവസാനിപ്പിക്കാൻ ഊർജിത നടപടി ആവശ്യമാണെന്നും യു.എ.ഇ നേതൃത്വം ആവശ്യപ്പെട്ടു. ഗസ്സ-ഇസ്രയേൽ സംഘർഷത്തിന്‍റെ പശ്​ചാത്തലത്തിൽ യു.എ.ഇ പ്രസിഡന്‍റ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാൻ യു.എസ്​ പ്രസിഡന്‍റ്​ ജോ ബൈഡനുമായും തുർക്കി പ്രസിഡന്‍റ്​ റജബ്​ ത്വയ്യിബ്​ ഉർദുഗാനുമായും സംസാരിച്ചു.

ഫോൺ സംഭാഷണത്തിൽ മേഖലയുടെ സുരക്ഷയും സ്ഥിരതയും ഉറപ്പുവരുത്തുന്നതിന്​ സംഘർഷം അവസാനിപ്പിക്കുന്നതിന്‍റെ ആവശ്യം നേതാക്കൾ പരസ്പരം പങ്കുവെച്ചു. സാധാരണ പൗരന്മാരെ സംരക്ഷിക്കാനും മാനുഷികസഹായം എത്തിക്കുന്നതിന് ​പ്രത്യേക കോറിഡോർ ഒരുക്കാനും സന്നദ്ധമാകണമെന്ന അഭിപ്രായവും ചർച്ചയിൽ ഉയർന്നു. സംഘർഷം അവസാനിപ്പിക്കുന്നതിന് ​മേഖലയിലും അന്താരാഷ്ട്ര തലത്തിലും ആവശ്യമായ സഹകരണം രൂപപ്പെടണമെന്നും നേതാക്കൾ അഭിപ്രായപ്പെട്ടു. യു.എ.ഇയുമായുള്ള നയതന്ത്ര ബന്ധം മെച്ചപ്പെടുത്തുന്നത് ​സംബന്ധിച്ചും യു.എസ്​, തുർക്കി പ്രസിഡന്‍റുമാരുമായുള്ള സംഭഷണത്തിൽ ശൈഖ്​ മുഹമ്മദ്​ അഭിപ്രായങ്ങൾ പങ്കുവെച്ചു.

കഴിഞ്ഞ ദിവസം യു.എ.ഇ വിദേശകാര്യ മന്ത്രി ശൈഖ്​ അബ്​ദുല്ല ബിൻ സായിദ്​ ആൽ നഹ്​യാനും ഇറാൻ വിദേശകാര്യ മന്ത്രി ഹുസൈൻ ആമിർ അബ്​ദുല്ലാഹിനും സംഭാഷണം നടത്തിയിരുന്നു. ഗസ്സ-ഇസ്രായേൽ സംഘർഷം ലഘൂകരിക്കുന്നതിന്​ ആവശ്യമായ നടപടികളും നീക്കങ്ങളും സംബന്ധിച്ച് ​ഇരുവരും അഭിപ്രായങ്ങൾ പങ്കുവെച്ചു. മേഖലയുടെ സുരക്ഷയും സ്ഥിരതയും തുടർച്ചയായി വെല്ലുവിളിയിലാകുന്ന സാഹചര്യത്തിലെ അപകടത്തെക്കുറിച്ചും മന്ത്രിമാർ സംസാരിച്ചു.

Summary: UAE steps up intervention to secure emergency aid in Gaza