ഗസ്സക്ക്​ ദാഹജലം പകരാൻ യു.എ.ഇ; കടൽവെള്ള ശുദ്ധീകരണ പ്ലാന്‍റുകള്‍ സ്ഥാപിച്ചു

ദുബൈ: യുദ്ധത്തിൽ ദുരിതമനുഭവിക്കുന്ന ഗസ്സയിലെ ജനതക്ക്​ ദാഹമകറ്റാൻ ശുദ്ധജല പ്ലാൻറുകൾ സ്ഥാപിച്ച് യു.എ.ഇ. കടൽവെള്ളം ശുദ്ധീകരിക്കുന്ന മൂന്ന്​ പ്ലാൻറുകളാണ്​ റഫ അതിർത്തിയുടെ ഈജിപ്ത്​ ഭാഗത്ത്​ നിർമിച്ചിട്ടുള്ളത്​. സംവിധാനങ്ങളുടെ ഉദ്​ഘാടനം യു.എ.ഇ രാഷ്ട്രീയകാര്യ അസി. മന്ത്രിയും യു.എന്നിലെ സ്ഥിരം പ്രതിനിധിയുമായ ലന നുസൈബ നിർവഹിച്ചു.

യു.എൻ രക്ഷാസമിതിയിലെ നിരവധി പ്രതിനിധികളുടെ സാന്നിധ്യത്തിലാണ്​ പദ്ധതി ഗസ്സൻ ജനതക്ക് ​സമർപ്പിച്ചത്​. യു.എ.ഇയുടെയും ഈജിപ്തിന്‍റെയും സഹകരണത്തിലാണ്​ യു.എൻ പ്രതിനിധികൾ റഫ അതിർത്തിയിലെത്തിയത്​. ദുരിതത്തിലായ ഗസ്സയിലെ ജനങ്ങളെ സഹായിക്കുന്നതിന്​ വേണ്ടി യു.എ.ഇ നടപ്പിലാക്കുന്ന വിവിധ പദ്ധതികളുടെ ഭാഗമായാണ്​ശുദ്ധീകരണ പ്ലാന്‍റുകൾ നിർമിച്ചത്​. കുടിവെള്ളത്തിന്‍റെ കുറവ്​ പ്രദേശം നിലവിൽ അനുഭവിക്കുന്നുണ്ട്​.

മൂന്ന് പുതിയ ഡീസലൈനേഷൻ പ്ലാന്റുകളിൽ നിന്നായി മൂന്നു ലക്ഷം പേർക്ക് കുടിവെള്ളം നൽകാൻ കഴിയുമെന്നാണ്​ കണക്കാക്കുന്നത്​. ഓരോ ദിവസവും ഏകദേശം 6,00,000 ഗാലൻ കടൽജലം സംസ്കരിച്ച് ഗസ്സയിലെ പൈപ്പ് ശൃംഖലയിലൂടെ അയക്കും.

യു.എ.ഇ നടപ്പിലാക്കുന്ന 'ഗാലന്റ് നൈറ്റ്-3' ഓപറേഷന്‍റെ ഭാഗമായാണ് റഫയില്‍ മൂന്ന് പ്ലാന്റുകള്‍ നിര്‍മ്മിക്കാൻ പദ്ധതിയിട്ടത്. യു.എ.ഇ പ്രസിഡന്റ് ശൈഖ് മുഹമ്മദ് ബിൻ സായിദ് ആല്‍ നഹ്​യാന്റെ നിര്‍ദേശമനുസരിച്ച്‌ ഫലസ്തീൻ ജനതയെ സഹായിക്കുന്നതിന്​ നവംബർ അഞ്ചിനാണ്​ 'ഗാലന്റ് നൈറ്റ്-3' ഓപറേഷൻ പ്രഖ്യാപിച്ചത്. എമിറേറ്റ്​സ്​ റെഡ് ​ക്രസൻറാണ്​ ഗസ്സയിലെ യു.എ.ഇയുടെ ദുരിതാശ്വാസ പ്രവർത്തനങ്ങൾക്ക് ​മേൽനോട്ടം വഹിക്കുന്നത്​.

Summary: UAE launches three water desalination plants to supply Gaza with drinking water