യു.എ.ഇയുടെ ചാന്ദ്രദൗത്യപേടകമായ 'റാശിദ്​റോവർ' തകർന്നതായി സൂചന

യു.എ.ഇയുടെ ചാന്ദ്രദൗത്യപേടകമായ 'റാശിദ്​റോവർ' തകർന്നിരിക്കാമെന്ന നിഗമനത്തിൽ അധികൃതർ. ചൊവ്വാഴ്ച രാത്രി ചന്ദ്രോപരിതലത്തിൽ ഇറങ്ങാനുള്ള ശ്രമത്തിനിടെ റാശിദ് റോവർ വഹിച്ചിരുന്ന ബഹിരാകാശ വാഹനമായ 'ഹകുട്ടോ-ആർ മിഷനു'മായുള്ള ആശയവിനിമയം നഷ്​ടപ്പെടുകയായിരുന്നു.

റാശിദ്​ റോവർ തകർന്നിരിക്കാനാണ്​ സാധ്യതയെന്ന്​ ലാൻഡർ ഉടമകളായ ജപ്പാന്‍റെ ഐസ്​പേസ്​ കമ്പനി വ്യക്​തമാക്കി​. എന്നാൽ എന്താണ് ​സംഭവിച്ചതെന്ന കാര്യത്തിൽ ബഹിരാകാശ വിദഗ്​ധർ അന്വേഷണം തുടരുകയാണ്​.

ലഭ്യമായവിവരങ്ങളെ അടിസ്ഥാനമാക്കി, ടോക്യോയിലെ നിഹോൻബാഷിയിലെ ഹകുട്ടോ-ആർ മിഷൻ കൺട്രോൾ സെന്‍ററാണ് ​റോവർ തകർന്നിരിക്കാമെന്ന നിഗമനം പുറത്തുവിട്ടത്​. ചന്ദ്രനിൽ ഇറങ്ങുന്നതിന്‍റെ അവസാന നിമിഷങ്ങളിലാണ് ​ആശയവിനിമയം നഷ്ടമായത്​. ആശയവിനിമയം നഷ്ടമാകുന്നതിന് ​തൊട്ടുമുമ്പ്​ പേടകത്തിന്‍റെ വേഗത വർധിക്കുകയും ചെയ്തിട്ടുണ്ട്​. ഇക്കാര്യം കണക്കിലെടുത്ത്​ ഇറങ്ങാനുള്ള നീക്കത്തിനിടെ പേടകത്തിലെ ഇന്ധനം തീർന്നതായും സൂചനയുണ്ട്​.

ഐസ്​പേസിന്‍റെ ആദ്യ ചാന്ദ്രദൗത്യമാണ് ​ഹകുട്ടോ-ആർ മിഷൻ. യു.എ.ഇയുടെയും മറ്റുചില രാജ്യങ്ങളുടെയും പേടകങ്ങൾ ഇത് ​വഹിച്ചിരുന്നു. യു.എ.ഇയുടെദീർഘകാല ചന്ദ്ര പര്യവേക്ഷണ പരിപാടിക്ക് കീഴിലെ ആദ്യ ദൗത്യമായ റാശിദ് റോവർ പൂർണമായും ഇമാറാത്തി എൻജിനീയർമാർ നിർമിച്ചതാണ്​. മുഹമ്മദ്​ബിൻ റാശിദ്​ ബഹിരാകാശ കേന്ദ്രത്തിലെ എൻജിനീയർമാർ ഇതിനകം രണ്ടാമത്തെ റോവറിന്‍റെ നിർമാണം തുടങ്ങിയിട്ടുണ്ട്​.

അതേസമയം, 'റാശിദി'ന്‍റെ നേട്ടങ്ങളിൽ അഭിമാനമുണ്ടെന്നും ഐസ്​പേസിന്​ നന്ദിയറിക്കുന്നതായും മുഹമ്മദ്​ബിൻ റാശിദ്​ ബഹിരാകാശ കേന്ദ്രം പ്രസ്താവനയിൽ പറഞ്ഞു. സ്വന്തമായി ഒരു പേടകം നിർമിക്കാനായതും ചന്ദ്രന്‍റെ ഭ്രമണപഥത്തിൽ പ്രവേശിക്കുന്നആദ്യ അറബ് ​പേടകമായതിലും അഭിമാനമുണ്ടെന്ന്​ ​കേന്ദ്രം ഡയറക്ടർ ജനറൽ സലീം അൽ മർറി പറഞ്ഞു.