ഗതാഗത നിയമലംഘനം; ദുബൈയിൽ രണ്ട്​ ദിവസത്തിനിടെ പിടികൂടിയത് 36 വാഹനങ്ങൾ

ദുബൈയിൽ കഴിഞ്ഞ രണ്ടു ദിവസത്തിനിടെ ട്രാഫിക്​ നിയമങ്ങൾ പാലിക്കുന്നതിൽ വീഴ്ചവരുത്തിയ 36 വാഹനങ്ങൾ പിടികൂടി. നിയമലംഘകർക്കെതിരെ നടപടി കടുപ്പിക്കുന്നതി​ന്റെ ഭാഗമായി റോഡുകളിൽ നിരീക്ഷണവും ശക്തമാക്കി. അപകടരഹിത യാത്ര ഉറപ്പാക്കാൻ ഡ്രൈവർമാർ ജാഗ്രത പുലർത്തണമെന്ന്​ ദുബൈ പൊലീസ് അറിയിച്ചു​.

അശ്രദ്ധവും അപകടകരവുമായ ഡ്രൈവിങ്​, റോഡിലെ മറ്റ്​ വാഹനങ്ങൾക്ക്​ പ്രയാസം സൃഷ്​ടിക്കുക, വാഹനങ്ങളുടെ എൻജിൻ, ചേസിസ്​ എന്നിവയിൽ നിയപരമല്ലാത്ത രീതിയിൽ മാറ്റം വരുത്തുക, നഗരവാസികൾക്ക്​ ശല്യം സൃഷ്​ടിക്കുക, നമ്പർപ്ലേറ്റിലെ വ്യക്​തതയില്ലായ്മ, ഡ്രൈിവിങ്ങിനിടെ റോഡിൽ മാലിന്യങ്ങൾ വലിച്ചെറിയുക തുടങ്ങിയ കുറ്റങ്ങളുടെ പേരിലാണ്​ 36 വാഹനങ്ങൾ​പിടികൂടിയത്​.

ഇത്തരം നിയമലംഘകർക്കെതിരെ കർശനമായ നടപടിയെടുക്കുമെന്ന്​ ജനറൽ ഡിപാർട്ട്​മെന്‍റ്​ ഓഫ്​ ട്രാഫികിന്‍റെ ഡെപ്യൂട്ടി ഡയറക്ടർ കേണൽ മുഹമ്മദ്​ അബ്​ദുള്ള ഖൽഫാൻ അൽ ഖുവേദി പറഞ്ഞു. 2023ൽ പാസാക്കിയ ഫെഡറൽ നിയമപ്രകാരം ഇത്തരം നിയമ ലംഘനങ്ങൾക്ക്​ 50,000 ദിർഹം വരെയാണ് ഫൈൻ. നിയമ ലംഘനങ്ങൾക്കെതിരെ ദുബൈ ട്രാഫിക് പൊലീസ്​ നേരത്തെ മുന്നറിയിപ്പു നൽകിയിരുന്നു. മറ്റുള്ളവരുടെ ജീവന്​ അപകടമുണ്ടാക്കുകയോ റോഡുകൾക്ക് കേടുപാടു വരുത്തുകയോ ചെയ്യുന്ന രീതിയിൽ അമിത വേഗതയിൽ വാഹനമോടിക്കുന്നവർക്കെതിരേയും ശക്​തമായ നടപടി സ്വീകരിക്കാനാണ്​ തീരുമാനം. . നിയമം ലംഘിക്കുന്നവരിൽ 80 ശതമാനം പേരും വലിയ അപകടങ്ങളിൽപ്പെടുകയും ഗുരുതരമായി പരിക്കേൽക്കുകയും ചെയ്യുന്നുണ്ട്​. നിയമലംഘകരെ പിടികൂടുന്നതിൽ പൊലീസ്​ വിട്ടുവീഴ്​ച കാണിക്കില്ല. ദുബൈ പൊലീസ്​ ആപ്പിലെ പൊലീസ്​ ഐ സേവനങ്ങൾ ഉപയോഗിച്ച് നിയമലംഘനങ്ങൾ അറിയിക്കണമെന്നും അധികൃതർ നിർദേശിച്ചു.