മുട്ടുവേദന അനുഭവിക്കാത്തവർ വളരെ ചുരുക്കമായിരിക്കും. നിവർത്താനും മടക്കാനും മാത്രമല്ല, ശരീരത്തിന്റെ ഭാരം താങ്ങാനും മുട്ടിന്റെ പ്രാധാന്യം വലുതാണ്. മുട്ടിനുണ്ടാകുന്ന ചെറിയ പ്രശ്നം പോലും ജീവിതത്തിൽ വലിയ ബുദ്ധിമുട്ടുകൾക്ക് കാരണമാകും. മൃദുവായതും വഴുവഴുപ്പുള്ളതുമായ തരുണാസ്ഥിയാണ് ആരോഗ്യകരമായ രീതിയിൽ മുട്ട് മടക്കാനും നിവർത്താനും സഹായിക്കുന്നത്. നിങ്ങളുടെ കാൽമുട്ടിന്റെ അസ്ഥികളുടെ അരികുകൾ സംരക്ഷിക്കുകയും വേണ്ട പിന്തുണ നൽകുകയും ചെയ്യുന്നതും തരുണാസ്ഥിയാണ്.

അസ്ഥികൾക്കിടയിലുള്ള രണ്ട് സി ആകൃതിയിലുള്ള മെനിസ്‌ക്കൽ തരുണാസ്ഥി നിങ്ങളുടെ കാൽമുട്ട് ജോയിന്റിനെ വേണ്ട രീതിയിൽ പ്രവർത്തിക്കാൻ സഹായിക്കും. ഇത് ബലഹീനമാകുമ്പോഴാണ് കാൽമുട്ട് വേദന, ലിഗമെന്റ് ഉളുക്ക്, പേശികളുടെ ബുദ്ധിമുട്ട് എന്നിവയുണ്ടാകുന്നത്. തരുണാസ്ഥി പൂർണമായും ക്ഷയിച്ചാൽ അസ്ഥികൾ തമ്മിൽ കുറയാൻ ഇടയാകും. തരുണാസ്ഥിയുടെ നഷ്ടം നികത്താൻ ചില അസ്ഥികൾ പുറത്തേക്ക് വികസിക്കാൻ തുടങ്ങും. ഇതാണ് വേദനയുണ്ടാക്കുന്നത്.

കാൽമുട്ടിന്റെ മുൻഭാഗത്ത് തീവ്രമായ വിങ്ങലുകളായും അനുഭവപ്പെട്ടേക്കാം. ഓട്ടം, സ്‌കിപ്പിംഗ്, കയറ്റം കയറുക, കാൽമുട്ട് വളച്ച് ദീർഘനേരം ഇരിക്കുക തുടങ്ങിയ പ്രവർത്തനങ്ങൾക്ക് പോലും കഴിയാത്ത അവസ്ഥയുണ്ടായേക്കാം. രോഗലക്ഷണങ്ങളുടെ കാഠിന്യം അനുസരിച്ച്, ആർത്രോസ്കോപ്പി, ഓസ്റ്റിയോടോമി അല്ലെങ്കിൽ ജോയിന്റ് റീപ്ലേസ്‌മെന്റ് പോലുള്ള ഇലക്‌റ്റീവ് സർജറി ചെയ്യാൻ ഡോക്ടർ നിർദ്ദേശിച്ചേക്കും.

അടിയന്തര വൈദ്യസഹായം ആവശ്യമായി വരുന്നത് ഈ ലക്ഷണങ്ങളാലാണ്:-

കഠിനമായ വേദന

തീവ്രവും ഏതാനും ദിവസം നീണ്ടുനിൽക്കുന്നതോ ആയ വേദന നിസാരമായി കാണരുത്. ഇത് മാസങ്ങളോളമോ വർഷങ്ങളോളമോ നീണ്ടുനിന്നേക്കാം. ജോയിന്റിലോ സന്ധികളിലോ മാത്രമായുള്ള വേദന ഇടുപ്പിലേക്ക് ബാധിക്കാനും സാധ്യതയുണ്ട്.

നീർവീക്കം

എന്തെങ്കിലും പരിക്ക് കാരണമോ അല്ലെങ്കിൽ ഭാരമെടുക്കുന്നത് മൂലമോ കാൽമുട്ടിനുള്ളിൽ അമിതമായി ദ്രാവകം അടിഞ്ഞുകൂടാൻ ഇടയാകും. ഇത് കാരണം മുട്ടുകൾ വീക്കമുള്ളതായി കാണപ്പെടുന്നു. ഇത് വേദനയ്ക്കും പേശീവലിവിനും കാരണമാകും. ചില സന്ദർഭങ്ങളിൽ നീർവീക്കം ശ്രദ്ധയിൽ പെടണമെന്നില്ല. എങ്കിലും കാൽമുട്ടിൽ കാഠിന്യം അനുഭവപ്പെടുന്നുണ്ടെങ്കിൽ ഉടൻ തന്നെ പരിശോധന നടത്തണം.

മുട്ടുകളിൽ നിന്നുണ്ടാകുന്ന ശബ്‌ദം

അൽപസമയം ഇരുന്നതിന് ശേഷമോ അല്ലെങ്കിൽ പെട്ടെന്ന് എഴുന്നേൽക്കുമ്പോഴോ മുട്ടിൽ നിന്ന് ആയ ശബ്ദം കേൾക്കുന്നത് കാല്മുട്ടുകളുടെ ബലഹീനതയുടെ സൂചനയാണ്. കാൽമുട്ടിന് അസ്ഥിരത അനുഭവപ്പെടുന്നുവെന്നാണ് ഇതിനർത്ഥം. കൂടാതെ, നിങ്ങളുടെ കാൽമുട്ട് മരവിക്കുകയോ ഇടയ്ക്കിടെ കുടുങ്ങിപ്പോകുകയോ ചെയ്യുകയാണെങ്കിൽ സർജനെ വൈദ്യപരിശോധനയ്ക്കായി കാണേണ്ട സമയമാണിത്.

ദുർബലമായ പേശികൾ

സ്ഥിരമായി വ്യായാമമില്ലാതായാൽ പേശികളുടെ അവസ്ഥ വഷളാകാൻ തുടങ്ങും. രോഗലക്ഷണങ്ങളൊന്നും ഇതിന് ഉണ്ടാകണമെന്നില്ല. ക്വാഡ്രിസെപ്സ്, ഹാംസ്ട്രിംഗ്സ്, ഗ്യാസ്ട്രോക്നെമിയസ് എന്നിവയാണ് കാൽമുട്ടിന്റെ ദീർഘായുസിന് ഏറ്റവും അത്യാവശ്യമായ പേശികൾ. ഈ പേശികൾ ദുർബലമാകുമ്പോൾ കാൽമുട്ട് ജോയിന്റ് ദുർബലമാകുന്നത് പോലുള്ള അവസ്ഥകൾ ഉണ്ടായേക്കാം. ഇത് മുട്ടുകൾ വളയുന്നതിനും വേദനയുണ്ടാകുന്നതിനും ഇടയാക്കും.

നിവർത്താനുള്ള ബുദ്ധിമുട്ട്

ചില സമയങ്ങളിൽ മുട്ടുകൾ നേരെയാക്കാൻ ബുദ്ധിമുട്ടുണ്ടാകാറുണ്ടോ. ഓസ്റ്റിയോ ആർത്രൈറ്റിസ് എന്ന അവസ്ഥയാണിത്. മാരത്തണർമാർ, മറ്റ് സജീവ കായികതാരങ്ങൾ തുടങ്ങി കൗമാരപ്രായത്തിൽ കാൽമുട്ടുകളിൽ സമ്മർദ്ദം ചെലുത്തുന്ന ആളുകൾക്ക് ഈ അവസ്ഥയുണ്ടാകാനുള്ള സാധ്യത കൂടുതലാണ്.