അപകീർത്തിക്കേസിൽ തടവുശിക്ഷ: വിധി ചോദ്യം ചെയ്ത് രാഹുൽ ഗുജറാത്ത് കോടതിയിലേക്ക്

സൂറത്തിലെ സെഷൻസ് കോടതിയിൽ നാളെയാണ് ഹരജി നൽകുക

Updated:
2023-04-02 07:50:45.0

Rahul Gandhi

ന്യൂഡൽഹി: അപകീർത്തിക്കേസിൽ രണ്ട് വർഷം തടവുശിക്ഷ വിധിച്ചതിനെതിരെ കോൺഗ്രസ് നേതാവ് രാഹുൽഗാന്ധി ഗുജറാത്ത് കോടതിയിലേക്ക്. സൂറത്തിലെ സെഷൻസ് കോടതിയിൽ നാളെയാണ് അദ്ദേഹം അപ്പീൽ ഹരജി നൽകുക. സൂറത്ത് ജില്ലാ കോടതി വിധിക്കെതിരെ രാഹുൽ നേരിട്ട് ഹാജരായാണ് അപ്പീൽ നൽകുക. വിധി വന്നശേഷം പെട്ടെന്ന് തന്നെ അപ്പീൽ നൽകിയിരുന്നില്ല. ശിക്ഷ വിധിച്ച്‌ ഒരാഴ്ചയ്ക്ക് ശേഷം വിശദമായി പഠിച്ചാണ്‌ അപ്പീൽ നൽകുന്നത്. എത്രയും വേഗം വിധിയ്ക്ക്‌ സ്‌റ്റേ വാങ്ങിയെടുക്കുകയാണ് ലക്ഷ്യം. കീഴ്‌ക്കോടതി വിധികൾക്ക് മേൽക്കോടതികൾ സ്‌റ്റേ നൽകുന്ന ഇന്ത്യൻ സാഹചര്യം തിരിച്ചറിഞ്ഞാണ് നീക്കം. പെട്ടെന്ന് അപ്പീൽ നൽകാത്തതിനെതിരെ പലകോണിൽ നിന്നും വിമർശനമുയർന്നിരുന്നു. എന്നാൽ രാഹുൽ ഗാന്ധിക്കെതിരെ വേറെയും കേസുകളുള്ളതിനാൽ കോൺഗ്രസ് ശ്രദ്ധാപൂർവം നിയമനടപടികൾ മുന്നോട്ട് കൊണ്ടുപോകുകയായിരുന്നു.

Also Read:2014 മുതൽ 2023 വരെ; ഇന്ത്യയിലുടനീളം രാഹുലിനെതിരെ നിരവധി കേസുകൾ

2019ലെ അപകീർത്തിക്കേസിൽ തടവ് ശിക്ഷ വിധിച്ചതിനെ തുടർന്ന് രാഹുലിന്റെ ലോക്‌സഭാ അംഗത്വത്തിന് അയോഗ്യത കൽപ്പിച്ചിരുന്നു. 2019ൽ ലോക്സഭാ തെരഞ്ഞെടുപ്പ് പ്രചാരണത്തിനിടെ കർണാടകയിലെ കോലാറിൽ രാഹുൽ ഗാന്ധി നടത്തിയ പ്രസംഗമാണ് കേസിനിടയാക്കിയത്. "ഒരു കാര്യം ചോദിക്കട്ടെ. ഈ കള്ളന്മാരുടെയെല്ലാം പേരുകളില്‍ എന്തുകൊണ്ടാണ് മോദിയുള്ളത്? നീരവ് മോദി, ലളിത് മോദി, നരേന്ദ്ര മോദി.." എന്നാണ് രാഹുല്‍ ഗാന്ധി പറഞ്ഞത്. മോദിയെന്ന പേരിനെ രാഹുൽ അപകീർത്തിപ്പെടുത്തിയെന്ന് ചൂണ്ടിക്കാട്ടി ഗുജറാത്ത് മുൻ മന്ത്രിയും എം.എൽ.എയുമായ പൂർണേഷ് മോദി കോടതിയെ സമീപിക്കുകയായിരുന്നു. കേസില്‍ സൂറത്ത് കോടതി രണ്ടു വര്‍ഷം തടവിന് ശിക്ഷിച്ചതിന്‌ പിന്നാലെ 15,000 രൂപയുടെ ബോണ്ടിൽ രാഹുലിന് ജാമ്യം ലഭിച്ചു.

രാഹുൽ ഗാന്ധിയുടെ ലോകസഭാംഗത്വം ലോക്സഭാ സെക്രട്ടറിയേറ്റാണ് റദ്ദാക്കിയത്. ഇനി ആറു വർഷത്തേക്ക് രാഹുലിന് മത്സരിക്കാൻ പറ്റില്ല. 1951 ലെ ജനപ്രാതിനിധ്യ നിയമം -ദി റെപ്രസന്റേഷൻ ഓഫ് പീപ്പിൾസ് ആക്ട് (ആർ.പി.എ) പ്രകാരമാണ് രാഹുലിനെ അയോഗ്യനാക്കിയത്. ക്രിമിനൽ കേസുകളിൽ ശിക്ഷിക്കപ്പെട്ടാലാണ് ഈ വകുപ്പ് പ്രകാരം ജനപ്രതിനിധിയുടെ സ്ഥാനം നഷ്ടപ്പെടുക. ആർപിഎ പ്രകാരം അയോഗ്യത കൽപ്പിക്കുന്നതിന് വിവിധ വകുപ്പുകളുണ്ട്. സെക്ഷൻ എട്ട് പ്രകാരമാണ് ശിക്ഷിപ്പെട്ട ജനപ്രതിനിധികൾക്ക് അയോഗ്യത കൽപ്പിക്കുന്നത്. രാഷ്ട്രീയത്തെ ക്രിമിനൽവത്കരിക്കപ്പെടുന്നതിൽനിന്ന് തടയാനാണ് ഈ വകുപ്പ്. കളങ്കിതരായ നേതാക്കളെ തെരഞ്ഞെടുപ്പിൽ മത്സരിക്കുന്നതിൽനിന്ന് നിയമം തടയുകയും ചെയ്യുന്നു.

അതേസമയം രാഹുൽ ഗാന്ധിയെ അയോഗ്യനാക്കിയതിൽ പ്രതിഷേധിച്ചും അദാനി വിഷയത്തിൽ ജെപിസി അന്വേഷണം ആവശ്യപ്പെട്ടും പ്രതിപക്ഷ പാർട്ടികളെ അണിനിരത്തി പ്രതിഷേധം സംഘടിപ്പിക്കാനാണ് കോണ്‍ഗ്രസിന്‍റെ നീക്കം. ഉടൻ പ്രതിപക്ഷപാർട്ടികളുടെ യോഗം വിളിക്കും. കോൺഗ്രസിന്‍റെ ഒരു മാസം നീണ്ട പ്രതിഷേധ പരിപാടി ജയ് ഭാരത് തുടരുകയാണ്. ബ്ലോക്ക്, മണ്ഡലം തലങ്ങളിലുള്ള സത്യഗ്രഹമാണ് നടക്കുന്നത്. ഏപ്രിൽ 8 ന് ശേഷം ഡിസിസി , പിസിസി തല പ്രതിഷേധവും ഏപ്രിൽ മൂന്നാം വാരം ഡൽഹിയിൽ വൻ പ്രതിഷേധവും സംഘടിപ്പിക്കും.