യുപിയിൽ ആറിടത്ത്​​ ബിജെപി; യോഗി ആദിത്യനാഥിന്​ ആശ്വാസം

ലഖ്​നൗ: ഉത്തർപ്രദേശിൽ ഉപതെരഞ്ഞെടുപ്പ്​ നടന്ന ഒമ്പത്​ മണ്ഡലങ്ങളിൽ ഏഴും നേടി എൻഡിഎ. ആറിടത്ത്​ ബിജെപിയും ഒരു സീറ്റിൽ​ രാഷ്​ട്രീയ ലോക്​ ദളും വിജയിച്ചു. രണ്ട്​ സീറ്റിൽ മാത്രമാണ്​ സമാജ്​വാദി പാർട്ടിക്ക്​ ജയിക്കാനായത്​.

ഈ വിജയം ബിജെപിക്ക്​ മാത്രമല്ല, മുഖ്യമന്ത്രി യോഗി ആദിത്യനാഥിനും വലിയ ആശ്വാസം നൽകുന്നതാണ്​. ലോക്​സഭാ തെരഞ്ഞെടുപ്പിൽ വലിയ തിരിച്ചടിയാണ്​ ബിജെപി നേരിട്ടത്​. 63ൽ 33 സീറ്റിൽ മാത്രമാണ്​ ജയിച്ചത്​. 2019ൽ 62 സീറ്റുകൾ ​ബിജെപി നേടിയിരുന്നു.

ലോക്​സഭാ തെരഞ്ഞെടുപ്പ്​ പരാജയത്തി​െൻറ പഴി മുഴുവൻ യോഗിക്കായിരുന്നു. ഇതിന്​ പിന്നാലെ യുപി ബിജെപിയിൽ കനത്ത ഭിന്നതയാണെന്ന വാർത്തകളും പുറത്തുവരികയുണ്ടായി. അടുത്ത തെരഞ്ഞെടുപ്പിൽ യോഗിയെ മുഖ്യമന്ത്രി സ്​ഥാനത്തുനിന്ന്​ മാറ്റുമെന്ന സൂചനകൾ വരെ ഉയർന്നിരുന്നു. ഇതിനിടയിലാണ്​ ഉപതെരഞ്ഞെടുപ്പിൽ ബിജെപി മിന്നുംജയം നേടുന്നത്​.

ഇത്തവണ ഉപതെരഞ്ഞെടുപ്പ്​ നടന്ന മണ്ഡലങ്ങളിൽ രണ്ട്​ സീറ്റ്​ മാത്രമാണ്​ ബിജെപിയുടെ കൈവശമുണ്ടായിരുന്നത്​. 2022ൽ സമാജ്​വാദി പാർട്ടി അഞ്ചിടത്ത്​ ജയിച്ചിരുന്നു. മൂന്ന്​ പതിറ്റാണ്ടിനിടെ വിജയിക്കാനാവാത്ത രണ്ട്​ സീറ്റുകളാണ്​ ഇത്തവണ ബിജെപി എസ്​പിയിൽനിന്ന്​ സ്വന്തമാക്കിയത്​. അതേസമയം, തങ്ങളുടെ വോട്ടർമാരെ ബൂത്തുകളിലേക്ക്​ വരാൻ അനുവദിച്ചില്ലെന്നും വോട്ടർമാരെ ഭയപ്പെടുത്തിയാണ്​ വിജയിച്ചതെന്നും സമാജ്​ വാദി പാർട്ടി അധ്യക്ഷൻ അഖിലേഷ്​ യാദവ്​ പറയുന്നു.

ഈ ആരോപണങ്ങൾക്കപ്പുറം യോഗിയുടെ വിജയമായിട്ടാണ്​ തെരഞ്ഞെടുപ്പിനെ വിദഗ്​ധർ നോക്കിക്കാണുന്നത്​. പ്രത്യേകിച്ച്​ യോഗി ഉയർത്തിയ ‘വിഭജിച്ചാൽ നാം അറുക്കപ്പെടും’ എന്ന മുദ്രാവാക്യം തെരഞ്ഞെടുപ്പിൽ വലിയ ചലനമാണ്​ സൃഷ്​ടിച്ചത്​. യുപിയിൽ മാത്രമല്ല, മഹാരാഷ്​ട്രയിൽ വരെ ഈ വർഗീയ മുദ്രാവാക്യം ബിജെപി ഉയർത്തുകയും വലിയ വിജയം നേടുകയും ചെയ്​തു.

യുപിയിലെ കന്ദാർക്കിയിലെ ബിജെപി വിജയമാണ്​ ഇതിൽ എടുത്തുപറയേണ്ടത്​. എസ്​പിയുടെ മുഹമ്മദ്​ റിസ്​വാനെതിരെ 85,000 വോട്ടി​െൻറ ഭൂരിപക്ഷത്തിലാണ്​ രംവീർ സിങ്​ ജയിച്ചത്​. 1993ലാണ്​ ഇവിടെ അവസാനമായി ബിജെപി ജയിച്ചത്​. അതിനുശേഷം രണ്ട്​ തവണ ബിഎസ്​പിയും മൂന്ന്​ തവണ എസ്​പിയും വിജയിച്ചു. 1993ന്​ ശേഷം ആദ്യമായാണ്​ ഒരു ഹിന്ദു സ്​ഥാനാർഥി ഇവിടെനിന്ന്​ വിജയിക്കുന്നത്​ എന്നായിരുന്നു വിജയശേഷം രംവീർ സിങ്​ പറഞ്ഞത്​. മറ്റു തെരഞ്ഞെടുപ്പുകളിൽ മുസ്​ലിംകളായിരുന്നു ഇവിടെനിന്ന്​ ജയിച്ചതെന്നും അദ്ദേഹം കൂട്ടിച്ചേർത്തു. കടേഹാരിയാണ്​ എസ്​പിയിൽനിന്ന്​ ബിജെപി പിടിച്ചെടുത്ത മറ്റൊരു മണ്ഡലം.

തെരഞ്ഞെടുപ്പിനിടെ പൊലീസി​െൻറ അതിക്രമത്തി​െൻറ പേരിൽ വാർത്തകളിൽ നിറഞ്ഞനിന്ന മണ്ഡലമായിരുന്നു മീരാപുർ . ഇവിടെ ബിജെപിയുടെ സഖ്യകക്ഷിയായ ആർഎൽഡിയാണ്​ ജയിച്ചത്​. മുസ്​ലിം സ്​ത്രീകൾ പോളിങ്​ ബൂത്തിലെത്തുന്നത്​ പൊലീസ്​ ഇൻസ്​പെക്​ടർ രാജീവ്​ ശർമ സർവീസ്​ റിവോൾവർ ഉപയോഗിച്ച്​ തടഞ്ഞിരുന്നു. ഇയാൾക്കെതിരെ കടുത്ത നടപടി സ്വീകരിക്കണമെന്ന്​ സമാജ്​വാദി പാർട്ടി ആവശ്യപ്പെടുകയുണ്ടായി.

എന്നാൽ, പൊലീസിനെ കല്ലെറിഞ്ഞുവെന്ന്​ കാണിച്ച്​ നാല്​ വനിതകൾക്കും 24 പുരുഷൻമാർക്കും പേരറിയാത്ത 120 പേർക്കുമെതിരെ പൊലീസ്​ കേസെടുക്കുകയാണ്​ ഉണ്ടായത്​. ഉദ്യോഗസ്​ഥനെ എതിർത്ത സ്​ത്രീകളിൽ ഒരാളായ ​തൗഹിദ ബീഗത്തെ അഖിലേഷ്​ യാദവ്​ ലഖ്​നൗവിലേക്ക്​ വിളിച്ചുവരുത്തുകയും അഭിനന്ദിക്കുകയും ചെയ്​തിരുന്നു. ഫുൽപുർ, ഗാസിയാബാദ്​, ഖൈർ, മജ്​വാൻ എന്നിവയാണ്​ ബിജെപി വിജയിച്ച മറ്റു മണ്ഡലങ്ങൾ.

അതേസമയം, ഉത്തർ പ്രദേശിലെയും മഹാരാഷ്​​ട്രയിലെയും ബിജെപിയുടെ തെരഞ്ഞെടുപ്പ്​ വിജയത്തിൽ സംശയം പ്രകടിപ്പിച്ച്​ സമാജ്​വാദി പാർട്ടി രംഗത്തുവന്നിട്ടുണ്ട്​. വോട്ടിങ്​ മെഷീനിൽ സംശയപ്രകടിപ്പിച്ച എസ്​പി നേതാവ്​ എസ്​.ടി ഹസൻ, തെരഞ്ഞെടുപ്പ്​ സംവിധാനം തകരാറിലായെന്നും ആരോപിച്ചു. ‘നമ്മുടെ തെരഞ്ഞെടുപ്പ്​ സംവിധാനം തകരാറിലായിട്ടുണ്ടെന്ന്​ കഴിഞ്ഞ അഞ്ച്​ വർഷമായി ഞങ്ങൾ പറയുന്നുണ്ട്​. ഞങ്ങൾ ഇലക്​ട്രോണിക്​ വോട്ടിങ്​ മെഷീനെ വിശ്വസിക്കുന്നില്ല. വോട്ടുയന്ത്രവും ബാലറ്റ്​ പേപ്പറും വേണമെന്നും വിവിപാറ്റ്​ വോട്ടർമാരുടെ കൈവശം നൽകണമെന്നും പാർലമെൻറിൽ നിരന്തരം ഉന്നയിച്ചതാണെന്നും എസ്​.ടി ഹസൻ കൂട്ടിച്ചേർത്തു.