ഗുരുവായൂരില്‍ ലഹരിപ്പാർട്ടി ചോദ്യം ചെയ്തതിന് ഫ്ലാറ്റ് ജീവനക്കാര്‍ക്ക് യുവാക്കളുടെ മര്‍ദനം; നാലുപേർക്ക് പരിക്ക്

തൃശൂർ: ഗുരുവായൂർ മമ്മിയൂരിൽ ഫ്ലാറ്റിൽ ലഹരി മാഫിയ സംഘത്തിന്റെ ആക്രമണം. ഫ്ലാറ്റ് കെയർടേക്കർ ഉൾപ്പെടെ ജീവനക്കാരായ മൂന്നു പേർക്ക് പരിക്കേറ്റു. ജീവനക്കാരെ വളഞ്ഞിട്ട് ആക്രമിക്കുന്ന സി.സി.ടി.വി ദൃശ്യങ്ങൾ പുറത്തുവന്നു. മമ്മിയൂരിലെ 'സൗപർണ്ണിക' ഫ്ലാറ്റിൽ ഇന്നലെ വൈകുന്നേരം മൂന്നരയോടെയായിരുന്നു സംഭവം. ഫ്ലാറ്റിൽ മുറിയെടുത്ത പത്തംഗസംഘം ലഹരി ഉപയോഗിച്ച് ബഹളമുണ്ടാക്കിയതോടെയാണ് പ്രശ്നങ്ങളുടെ തുടക്കം. ജീവനക്കാർ ഇത് ചോദ്യം ചെയ്തതോടെ കയ്യാങ്കളിയായി.

സംഘർഷത്തിന് പിന്നാലെ ഫ്ലാറ്റ് ഒഴിയണമെന്ന് ആവശ്യപ്പെട്ടതോടെ യുവാക്കൾ വീണ്ടും പ്രകോപിതരായി. കെയർടേക്കർ ഉൾപ്പെടെ നാലുപേർക്ക് യുവാക്കളുടെ ആക്രമണത്തിൽ പരിക്കേറ്റു. സംഭവത്തിൽ ഒരാളെ പൊലീസ് കസ്റ്റഡിയിലെടുത്തിട്ടുണ്ട്. വാഹന വില്പനയുമായി ബന്ധപ്പെട്ട ഇടപാടുകൾക്ക് വേണ്ടിയാണ് യുവാക്കൾ ഫ്ലാറ്റ് വാടകയ്ക്ക് എടുത്തത്. മറ്റ് പ്രതികൾക്കായുള്ള അന്വേഷണവും പൊലീസ് ഊർജിതമാക്കി.