എം എ യൂസഫലി സഞ്ചരിച്ച ഹെലികോപ്റ്റര്‍ ഇടിച്ചിറക്കി
കൊച്ചിയിലെ പനങ്ങാട് ചതുപ്പ് നിലത്താണ് ഹെലികോപ്റ്റര്‍ ഇറക്കിയത്.
ലുലു ഗ്രൂപ്പ്‌ ചെയർമാൻ എം എ യൂസഫലിയും കുടുംബവും സഞ്ചരിച്ച ഹെലികോപ്റ്റർ അപകടത്തിൽപെട്ടു. കൊച്ചി പനങ്ങാട് ചതുപ്പ് പ്രദേശത്താണ് ഹെലികോപ്റ്റർ ഇടിച്ചിറക്കിയത്. സ്വകാര്യ ആശുപത്രിയിൽ പ്രവേശിപ്പിച്ച യൂസഫലിയുടെ ആരോഗ്യനില തൃപ്തികരമാണ്. സംഭവത്തെ കുറിച്ച് വിശദമായ അന്വേഷണം ആരംഭിച്ചു.
കൊച്ചിയിലെ സ്വകാര്യ ആശുപത്രിയിൽ ചികിത്സയിൽ കഴിയുന്ന പിതൃസഹോദരനെ കാണാനുള്ള യാത്രയ്ക്കിടെ ആണ് യൂസഫലിയുടെ ഹെലികോപ്റ്റർ അപകടത്തിൽപെട്ടത്. രാവിലെ എട്ടരയോടെ പനങ്ങാട് ഫിഷറീസ് സർവകലാശാല ഗ്രൗണ്ടിൽ ലാൻഡ് ചെയ്യാനുള്ള ശ്രമത്തിനിടെ നിയന്ത്രണം വിട്ട് സമീപത്തെ ചതുപ്പിൽ വീഴുകയായിരുന്നു. യൂസഫലിയും ഭാര്യയും ഉൾപ്പെടെ 6 പേർ ആണ് ഹെലികോപ്റ്ററിൽ ഉണ്ടായിരുന്നത്. കനത്ത മഴയും കാറ്റും പ്രദേശത്ത് ഉണ്ടായിരുന്നു. സമീപവാസി ആണ് രക്ഷാപ്രവർത്തനത്തിന് നേതൃത്വം കൊടുത്തത്.
യൂസഫലി ഉൾപ്പെടെ ആർക്കും പരിക്കില്ലെന്ന് ലുലു ഗ്രൂപ്പ്‌ അറിയിച്ചു. വ്യോമയാന മന്ത്രാലയത്തിലെ വിദഗ്‌ധർ ഹെലികോപ്റ്ററിൽ പരിശോധന നടത്തും.
Adjust Story Font
16
