നടിയെ ആക്രമിച്ച കേസിന്റെ മേൽനോട്ട ചുമതലയിൽനിന്ന് ശ്രീജിത്ത് ഐ.പി.എസ്സിനെ മാറ്റിയതിനെതിരായ ഹരജി തള്ളി

എറണാകുളം: നടിയെ ആക്രമിച്ച കേസിന്റെ മേൽനോട്ട ചുമതലയിൽനിന്ന് ശ്രീജിത്ത് ഐ.പി.എസിനെ മാറ്റിയതിനെതിരായ ഹരജി ഹൈകോടതി തള്ളി. സ്വഭാവിക നടപടി ക്രമവും സാധാരണ സ്ഥലം മാറ്റവുമാണെന്ന സർക്കാർ വിശദീകരണം കോടതി അംഗീകരിച്ചു. അഡ്മിനിസ്‌ട്രേറ്റിവ് കാര്യങ്ങളിൽ കോടതിക്ക് ഇടപെടാനുള്ള പരിമിതി ചൂണ്ടിക്കാട്ടിയാണ് ഹരജി തള്ളിയത്.

നടിയെ ആക്രമിച്ച കേസിൽ തുടരന്വേഷണം നടന്നുകൊണ്ടിരിക്കെയാണ് ശ്രീജിത്ത് ഐ.പി.എസിനെ ഈ സ്ഥാനത്ത്‌നിന്ന് മാറ്റിയത് എന്ന് ചൂണ്ടിക്കാട്ടി കേരള സ്റ്റേറ്റ് ബോർഡ് ഓഫ് ഇന്റർനാഷണൽ ഹ്യൂമൺ റൈറ്റ്‌സ് കൗൺസിലിനു വേണ്ടി ബൈജു കൊട്ടാരക്കരയാണ് ഹരജി നൽകിയിരുന്നത്. കേസ് അട്ടിമറിക്കാനുള്ള സാധ്യതയുണ്ടെന്ന് ചൂണ്ടിക്കാട്ടി സ്ഥലമാറ്റം റദ്ദാക്കണമെന്ന ആവശ്യം ഹരജിക്കാരൻ മുന്നോട്ട് വെക്കുകയായിരുന്നു. ചീഫ് ജസ്റ്റിസ് അടക്കമുള്ള ഡിവിഷൻ ബെഞ്ചാണ് ഹരജി തള്ളിയത്. ഭരണപരമായ കാര്യങ്ങളിൽ കോടതിക്ക് ഇടപെടാനുള്ള പരിമിതികൾ വ്യക്തമാക്കിയാണ് കോടതിയുടെ നടപടി.