'വഖഫ് സ്വത്തുക്കൾ കൈയടക്കാൻ കേന്ദ്രത്തിന്റെ ദുരുദ്ദേശ്യം'- ഇ.ടി മുഹമ്മദ് ബഷീർ
വഖഫ് ഭേദഗതി ബിൽ പാർലമെന്റിൽ വരികയാണെങ്കിൽ എതിർക്കുമെന്നും ഇ.ടി മുഹമ്മദ് ബഷീർ.
ഡൽഹി: വഖഫ് ഭേദഗതി ബില്ലിലൂടെ വഖഫ് സ്വത്തുകൾ കേന്ദ്രസർക്കാറിന്റെ നിയന്ത്രണത്തിലേക്ക് കൊണ്ടുവരാനുള്ള ശ്രമമാണെന്ന് ഇ.ടി മുഹമ്മദ് ബഷീർ എം.പി. സർക്കാറിന്റെ ദുരുദ്ദേശ്യത്തിന്റെ ഭാഗമായാണ് ഈ നീക്കം. ഉടമസ്ഥാവകാശത്തിൽ കടന്നുകയറി വഖഫ് ബോർഡിനെ തകർക്കുകയാണ് ബി.ജെ.പി ലക്ഷ്യം. ബിൽ പാർലമെന്റിൽ വരികയാണെങ്കിൽ എതിർക്കുമെന്നും ഇ.ടി മുഹമ്മദ് ബഷീർ പറഞ്ഞു.
വഖഫ് ബോര്‍ഡിന്റെ അധികാരങ്ങള്‍ വെട്ടിക്കുറക്കാനാണ് കേന്ദ്രസര്‍ക്കാര്‍ നീക്കം. വഖഫ് നിയമത്തില്‍ 40 ഭേദഗതികള്‍ കൊണ്ടുവരാനാണ് ഒരുങ്ങുന്നത്. ഇതുമായി ബന്ധപ്പെട്ട ബില്‍ ഇന്ന് പാര്‍ലമെന്റിൽ അവതരിപ്പിച്ചേക്കും. വെള്ളിയാഴ്ച നടന്ന കേന്ദ്രമന്ത്രിസഭാ യോഗമാണ് ബില്ലിന് അംഗീകാരം നല്‍കിയത്.
വഖഫ് സ്വത്തുക്കളെന്നവകാശപ്പെടുന്ന ഭൂമി കര്‍ശന പരിശോധനകള്‍ക്ക് ഇനിമുതല്‍ വിധേയമാക്കും. തര്‍ക്ക ഭൂമികളും സര്‍ക്കാര്‍ പരിശോധിക്കും. 9.4 ലക്ഷം ഏക്കര്‍ വസ്തുവകകളാണ് വഖഫ് ബോര്‍ഡിന് കീഴിലുള്ളതെന്നാണ് കണക്ക്. വഖഫ് കൗണ്‍സിലുകളിലും സംസ്ഥാന വഖഫ് ബോര്‍ഡുകളിലും ഇനിമുതല്‍ വനിതാ പ്രാതിനിധ്യവും ഉറപ്പുവരുത്തും.
യു.പി.എ സര്‍ക്കാരിന്റെ കാലത്ത് വഖഫ് ബോർഡുകള്‍ക്ക് നല്‍കിയ കൂടുതല്‍ അധികാരം എടുത്തുകളയുകയാണ് മോദി സർക്കാറിന്റെ ലക്ഷ്യം. വഖഫ് ബോർഡിന്റെ സ്വയംഭരണാവകാശം തകർക്കാനും മതസ്വാതന്ത്ര്യത്തിന് വിരുദ്ധമായ ഇടപെടൽ നടത്താനുമാണ്‌ മോദി സർക്കാർ ലക്ഷ്യമിടുന്നതെന്ന് അസദുദ്ദീൻ ഉവൈസി എം.പി പറഞ്ഞു.
വഖഫ് ബോര്‍ഡിന്റെ ഘടനയില്‍ മാറ്റം വരുത്താനുള്ള നിര്‍ദേശവും ബില്ലില്‍ ഉള്‍പ്പെടുത്തിയിട്ടുണ്ട്. കൂടാതെ നിലവിലെ നിയമത്തിലുള്ള ചില വ്യവസ്ഥകള്‍ റദ്ദാക്കാനും പുതിയ ഭേദഗതി നിര്‍ദേശിക്കുന്നു. വഖഫ് സ്വത്തുക്കള്‍ ദുരുപയോഗം ചെയ്യുന്നത് തടയാനായി സ്വത്തുക്കള്‍ക്ക് മേല്‍നോട്ടം വഹിക്കാന്‍ ജില്ലാ മജിസ്‌ട്രേറ്റിനേയും ചുമതലപ്പെടുത്താന്‍ കേന്ദ്രസര്‍ക്കാര്‍ ആലോചിക്കുന്നുണ്ട്.
Adjust Story Font
16
