"വിവരമില്ലാത്ത രാഷ്ട്രീയക്കാരന്‍റെ പാഴ്‌വാക്ക്"; സി.ടി. വർഗീസിന്‍റെ ഭീഷണി വകവക്കുന്നില്ലെന്ന് കെ.സുധാകരന്
ധീരജിന്‍റെ കൊലപാതകം ഇരന്നുവാങ്ങിയതാണ് എന്നു പറഞ്ഞതിൽ ഉറച്ചു നിൽക്കുന്നുവെന്ന് സുധാകരന്
സി.ടി. വർഗീസിന്‍റെ പരാമർശം വിവരമില്ലാത്ത രാഷ്ട്രീയക്കാരന്‍റെ പാഴ്‌വാക്കാണെന്ന് കെ.പി.സി.സി പ്രസിഡന്‍റ് കെ.സുധാകരന്. ഇത്തരം ഭീഷണികളെ വകവക്കുന്നില്ല. കേസെടുക്കണമെന്ന് വ്യക്തിപരമായി താല്പര്യമില്ല. എന്നാൽ കേസെടുക്കുന്നതിൽ എതിർപ്പുമില്ല. സുധാകരന് പറഞ്ഞു. ധീരജിന്‍റെ കൊലപാതകം ഇരന്നുവാങ്ങിയതാണ് എന്നു പറഞ്ഞതിൽ താന്‍ ഉറച്ചു നിൽക്കുന്നുവെന്നും സുധാകരന് കൂട്ടിച്ചേര്‍ത്തു.
സുധാകരന് സി.പി.എം കൊടുക്കുന്ന ഭിക്ഷയാണ് ജീവിതമെന്നും ഒരു നികൃഷ്ട ജീവിയെ കൊല്ലാൻ താത്പര്യമില്ലാത്തതുകൊണ്ടാണെന്നുമായിരുന്നു സി.വി വർഗീസിന്‍റെ പരാമര്‍ശം. കോൺഗ്രസിന്‍റെ കൊലപാതക രാഷ്ട്രീയത്തിനെതിരെ ചെറുതോണിയിൽ നടത്തിയ പ്രതിഷേധ സംഗമത്തിലായിരുന്നു ഭീഷണി പ്രസംഗം. പ്രസംഗം വിവാദമായതോടെ വര്‍ഗീസ് വിശദീകരണവുമായി രംഗത്തെത്തി. താൻ പറഞ്ഞതിൽ തെറ്റില്ലെന്നും ധീരജിന്‍റെ ചോര ഉണങ്ങും മുമ്പ് സുധാകരൻ പ്രകോപനപരമായി സംസാരിച്ചിരുന്നെന്നും അതിനാണ് സുധാകരന് മറുപടി നൽകിയതെന്നും സി.വി വർഗീസ് പറഞ്ഞു.
അതേസമയം, സി.വി വർഗീസിനെ ന്യായീകരിച്ച് എം.എം മണിയും രംഗത്തെത്തി. സുധാകരന്റെ പ്രകോപനത്തോട് പ്രതികരിക്കുക മാത്രമാണ് വർഗീസ് ചെയ്തതെന്നാണ് എം.എം മണി വ്യക്തമാക്കിയത്. കഴിഞ്ഞ ഒരാഴ്ചക്കാലമായി അക്രമരാഷ്ട്രീയത്തിനെതിരെ സി.പി.എമ്മും കോണ്‍ഗ്രസും ജില്ലയില്‍ വിവിധയിടങ്ങളില്‍ പരിപാടികള്‍ നടത്തിവരുന്നുണ്ട്. കരിമണ്ണൂരില്‍ കോണ്‍ഗ്രസ് പ്രവര്‍ത്തകന് നേരെയുണ്ടായ അക്രമത്തെ അതിരൂക്ഷമായ ഭാഷയിലാണ് സുധാകരന് വിമര്‍ശിച്ചത്. ധീരജ് വധക്കേസ് പ്രതികളെ ന്യായീകരിക്കുന്ന സമീപനവും ചെറുതോണിയില്‍ നടന്ന പരിപാടിയില്‍ സുധാകരന് സ്വീകരിച്ചിരുന്നു. ഇതിന്‍റെ പശ്ചാത്തലത്തിലായിരുന്നു സി.വി വർഗീസിന്‍റെ വിവാദ പരാമര്‍ശം.
Adjust Story Font
16
