'സാദിഖലി തങ്ങളെ ഒറ്റതിരിഞ്ഞ് ആക്രമിക്കാൻ അനുവദിക്കില്ല'; മുക്കം ഉമർ ഫൈസിക്കെതിരെ കെ.എം ഷാജി

കോഴിക്കോട്: സമസ്ത നേതാവ് മുക്കം ഉമർ ഫൈസിയുടെ പാണക്കാട് സാദിഖലി ശിഹാബ് തങ്ങൾക്കെതിരായ പരാമർശത്തിനെതിരെ മുസ്‌ലിം ലീഗ് നേതാവ് കെ.എം ഷാജി. സാദിഖലി തങ്ങളെ ഒറ്റതിരിഞ്ഞ് അക്രമിക്കാമെന്ന് ആരും കരുതേണ്ടെന്ന് ഷാജി പറഞ്ഞു. സിപിഎമ്മിന്റെ സ്ലീപിങ് സെല്ലുകൾ സമുദായത്തിനകത്ത് പ്രവർത്തിക്കുന്നുണ്ടെന്നും അദ്ദേഹം പറഞ്ഞു.

മലപ്പുറം വളാഞ്ചേരിയിൽ മുസ്‌ലിം ലീഗ് സമ്മേളനത്തിൽ സംസാരിക്കുകയായിരുന്നു കെ.എം ഷാജി. സമസ്തക്കാർ മാത്രമല്ല മറ്റു സംഘടനകളിലുമുള്ളവർക്കു കൂടിയുള്ളതാണ് ലീഗ്. സമുദായത്തിന്റെ ആകെ നേതൃത്വമാണ് പാണക്കാട് കുടുംബം. എല്ലാ മതസമുദായങ്ങളെയും ഒരുമിപ്പിക്കുന്ന നേതൃത്വമാണ് അവർ. സമസ്ത പരന്നുകിടക്കുന്ന വലിയൊരു ആശയമാണ്. എല്ലാവരെയും ഉൾക്കൊള്ളുന്ന വിശാലമായ ഐക്യസംഘമാണത്. അതിനു മുകളിലാണ് പാണക്കാട് സയ്യിദുമാർ ഇരിക്കുന്നതെന്നും അദ്ദേഹം പറഞ്ഞു. ഉമർ ഫൈസിക്കെതിരെ നടപടി വേണമെന്ന് ഷാജി ആവശ്യപ്പെട്ടു.

ഏതു കൊമ്പത്തുള്ളയാളായാലും സിപിഎമ്മും മാർക്‌സിസവും കൊള്ളാമെന്നു കരുതുന്നവർക്ക് അങ്ങോട്ടു പോകാം. പക്ഷേ, സമുദായത്തെ അവിടേക്കു കൊണ്ടുപോകാമെന്ന് ആരും കരുതേണ്ട. ഞങ്ങൾ പടയാളികളെപ്പോലെ പൊരുതി ഇവിടെ നിൽക്കുമെന്നും ഷാജി പറഞ്ഞു.

Summary: Muslim League leader KM Shaji against Samastha leader Mukkam Umar Faizy's remarks against Panakkad Sadiqali Shihab Thangal