ചോരക്കുഞ്ഞിന്റെ ചോരക്കറ മായാതെ...

കൊച്ചി പനമ്പിള്ളി നഗറില്‍ നവജാത ശിശുവിന്റെ മൃതദേഹം നടുറോഡില്‍ കണ്ടെത്തിയതിന്റെ നടുക്കത്തിലാണ് കേരളം. ജന്മം നല്‍കിയ അമ്മ കുഞ്ഞിന്റെ ജീവനെടുത്ത ശേഷം വലിച്ചെറിഞ്ഞതാണ് ആ കുഞ്ഞുശരീരത്തെ.

കാരണങ്ങള്‍ പലതാകാം. പക്ഷേ, ഒരു ന്യായീകരണത്തിനും ഈ ഹീനകൃത്യത്തെ മറപിടിക്കാനാകില്ല.

അമ്മയ്ക്കുള്ള ശിക്ഷ നീതിന്യായ കോടതി വിധിക്കട്ടെ. പക്ഷേ, കുഞ്ഞിന്റെ മൃതദേഹം കിടന്ന റോഡില്‍ ഇപ്പോഴും ആ ചോരക്കറ മായാതെ കിടപ്പുണ്ട്.

അമ്മയ്ക്കെതിരെ കൊലക്കുറ്റത്തിന് പുറമെ മൃതദേഹത്തോട് അനാദരവ് കാട്ടിയതിനടക്കം പൊലീസ് കേസെടുത്തിട്ടുണ്ട്. നല്ല കാര്യം. എന്നാല്‍, ആ കുഞ്ഞിന്റെ ഇളംരക്തം തളം കെട്ടിയത് കഴുകിക്കളയാന്‍ എന്തേ പൊലീസും മറ്റു ഉത്തരവാദിത്തപ്പെട്ട ആളുകളും മറന്ന് പോയതാണോ?

സംഭവം നടന്ന് രണ്ട് ദിവസം പിന്നിടിമ്പോഴും പനമ്പിള്ളി നഗറിലെ ആ ഫ്ലാറ്റിന് മുന്നിലെ റോഡില്‍ ചോരക്കറയുണ്ട്. കൊലപാതക വിവരം അറിഞ്ഞവരെല്ലാം നെടുവീര്‍പ്പോടെ ആ രക്തക്കറയിലേക്ക് എത്തിനോക്കിയല്ലാതെ കടന്നുപോകുന്നില്ല.

അറിയാത്തവര്‍ പലരും ആ കുഞ്ഞിന്റെ രക്തക്കറയില്‍ ചവിട്ടി മുന്നോട്ട് നീങ്ങുന്നു. ഇടതടവില്ലാതെ വാഹനങ്ങള്‍ കയറിയിറങ്ങുന്നു. ശാസ്ത്രീയ തെളിവുകള്‍ ശേഖരിച്ച സ്ഥിതിക്ക് എത്രയും വേഗത്തില്‍ പൊലീസോ മറ്റു അധികൃതരോ ആ രക്തം കഴുകിക്കളയേണ്ടതായിരുന്നു. വലിയ അനാസ്ഥയല്ലേ ഇത്....?

മുഹ്സിന അസ്സു
പ്രിന്‍സിപ്പല്‍ കറസ്പോണ്ടന്റ്, കൊച്ചി