റിഷഭ് പന്തിനെ വിദഗ്ധ ചികിത്സക്കായി മുംബൈയിലേക്ക് മാറ്റും

ന്യൂഡൽഹി: വാഹനാപകടത്തിൽ പരിക്കേറ്റ ഇന്ത്യൻ ക്രിക്കറ്റ് താരം റിഷഭ് പന്തിനെ വിദഗ്ധ ചികിത്സക്കായി മുംബൈയിലേക്ക് മാറ്റും. ഇന്ന് തന്നെ ആശുപത്രി മാറ്റുമെന്നാണ് ബി.സി.സി.ഐ നൽകുന്ന വിവരം. നേരത്തെ ഡൽഹിയിലെ ആശുപത്രിയിലേക്ക് മാറ്റുമെന്നാണ് പറഞ്ഞിരുന്നത്. പിന്നീട് മുംബൈയിലേക്ക് മാറ്റാൻ തീരുമാനിക്കുകയായിരുന്നു.

മുംബൈ ലീലാവതി ആശുപത്രിയിൽ ഇതുമായി ബന്ധപ്പെട്ട ഒരുക്കങ്ങൾ ആരംഭിച്ചിട്ടുണ്ട്. കാൽപാദത്തിലെ പൊട്ടലുകൾ അടക്കം സാരമായി പരിക്കേറ്റ താരത്തെ എത്രയും വേഗം കളിക്കളത്തിലേക്ക് തിരിച്ചെത്തിക്കാനുള്ള ശ്രമത്തിലാണ് ബി.സി.സി.ഐ.

കഴിഞ്ഞ വെള്ളിയാഴ്ച രാവിലെയാണ് റിഷഭ് പന്ത് ഓടിച്ച കാർ അപകടത്തിൽപ്പെട്ടത്. ഡെറാഡൂണിലെ മാക്‌സ് ആശുപത്രിയിലാണ് താരം ഇപ്പോഴുള്ളത്. മുംബൈ ലീലാവതി ആശുപത്രിയിൽ ബി.സി.സി.ഐയുടെ വിദഗ്ധ ഡോകർമാരുടെ സംഘമാണ് പന്തിനെ ചികിത്സിക്കുക.