മത്സരത്തിന് പിന്നാലെ റഫറി ഓടിപ്പോയി, അത് തന്നെ എല്ലാം പറയുന്നു -വാൻഡൈക്
![euro2024 euro2024](https://www.mediaoneonline.com/h-upload/2024/07/11/1433116-vandijik.webp)
മ്യൂണിക്: യൂറോ കപ്പിൽ ഇംഗ്ലണ്ടിനെതിരായ സെമിഫൈനൽ തോൽവിക്ക് പിന്നാലെ റഫറിക്കെതിരെ രൂക്ഷ വിമർശനവുമായി നെതർലൻഡ്സ് ക്യാപ്റ്റൻ വിർജിൽ വാൻഡൈക്. മത്സരത്തിന് ഫൈനൽ വിസിലൂതിയതിന് പിന്നാലെ റഫറിയെ കാണാൻ പോലും കിട്ടിയില്ലെന്നായിരുന്നു വാൻഡൈകിെൻറ പ്രതികരണം.
‘‘അവർ നല്ല നിമിഷങ്ങൾ സൃഷ്ടിച്ചു. ഞങ്ങളും അതുപോലെത്തന്നെ. അവസാന മിനുറ്റിൽ ഗോൾ വഴങ്ങുകയെന്നത് അംഗീകരിക്കാൻ ബുദ്ധിമുട്ടുള്ള കാര്യമാണ്. പ്രത്യേകിച്ചും ഒരു സെമിഫൈനലിൽ. അത് ഞങ്ങളുടെ സ്വപ്നങ്ങളെല്ലാം തകർത്തു’’
‘‘മത്സരത്തിന് ഫൈനൽ വിസിൽ മുഴക്കിയതിന് പിന്നാലെ റഫറി ഓടിപ്പോയി. അതുതന്നെ എല്ലാം പറയുന്നുണ്ട്. കൈകൊടുക്കാൻ പോലും സമയമില്ലായിരുന്നു.അവർ ചെയ്തത് വിശദീകരിക്കാനുള്ള ബാധ്യത അവർക്കുണ്ട്. മോശമായി എന്തെങ്കിലും ചെയ്യുേമ്പാൾ ഞങ്ങൾ വിശദീകരിക്കുന്നത് പോലെ അവർ ഞങ്ങളോട് സംസാരിച്ചില്ല. എന്തായാലും മറ്റുള്ളവരെക്കുറിച്ച് പറയുന്നില്ല, ഞങ്ങളിലേക്ക് തന്നെ നോക്കേണ്ടതുണ്ട്’’ -വാൻഡിക് പറഞ്ഞു.
മത്സരത്തിൽ ഇംഗ്ലണ്ടിനുകൂലമായി പെനൽറ്റി വിധിച്ചതടക്കം റഫറിയുടെ ഒട്ടേറെ തീരുമാനങ്ങൾ വിവാദങ്ങൾ ക്ഷണിച്ചു വരുത്തിയിട്ടുണ്ട്.
Adjust Story Font
16