അൽ ജസീറ ഗസ്സ ബ്യൂറോ ചീഫ് വാഇൽ ദഹ്ദൂഹിന്റെ കുടുംബം ഇസ്രായേൽ വ്യോമാക്രമണത്തിൽ കൊല്ലപ്പെട്ടു

ഗസ്സ: അൽ ജസീറ ഗസ്സ ബ്യൂറോ ചീഫ് വാഇൽ അൽ ദഹ്ദൂഹിന്റെ കുടുംബം ഇസ്രായേൽ വ്യോമാക്രമണത്തിൽ കൊല്ലപ്പെട്ടു. ദഹ്ദൂഹിന്റെ ഭാര്യ, മകൻ, മകൾ, പേരക്കുട്ടി എന്നിവരാണ് കൊല്ലപ്പെട്ടത്. അൽ അഖ്‌സ ആശുപത്രിയിലെത്തി കൊല്ലപ്പെട്ട കുടുംബാംഗങ്ങൾക്ക് അന്തിമോപചാരമർപ്പിക്കുന്ന ദഹ്ദൂഹിന്റെ ദൃശ്യങ്ങൾ അൽ ജസീറ സംപ്രേക്ഷണം ചെയ്തിരുന്നു. പിതാവിനെപ്പോലെ മാധ്യമപ്രവർത്തകനാകാൻ ആഗ്രഹിച്ച മകൻ 15-കാരനായ മഹ്മൂദിന്റെ മുഖത്ത് തലോടുന്ന ദഹ്ദൂഹിന്റെ ദൃശ്യങ്ങൾ ഹൃദയഭേദകമായിരുന്നു.

''സ്ത്രീകളെയും കുട്ടികളെയും ലക്ഷ്യമിട്ട് നടത്തുന്ന ആക്രമണത്തിന്റെ പരമ്പരയാണിത്. ഞാൻ യർമൂക്കിൽ ഇതുപോലുള്ള ഒരു ആക്രമണത്തെക്കുറിച്ച് റിപ്പോർട്ട് ചെയ്യുകയായിരുന്നു. നുസയ്‌റാത്ത് അടക്കം നിരവധി പ്രദേശങ്ങളെ ലക്ഷ്യമിട്ട് ശക്തമായ ആക്രമണമാണ് ഇസ്രായേൽ നടത്തുന്നത്''- ദഹ്ദൂഹ് പറഞ്ഞു.

Aljazeera' s brave veteran journalist Wael Dahdouh's wife, son and daughter were killed in an Israeli airstrike which targeted a shelter house they had fled to. Wael received the news while on air covering the nonstop Israeli strikes on Gaza! pic.twitter.com/G2Z8UreboU

— Mohamed Moawad (@moawady) October 25, 2023

നുസയ്‌റാതിലെ അഭയാർഥി ക്യാമ്പിന് നേരെ നടന്ന വ്യോമാക്രമണത്തിലാണ് വാഇൽ ദഹ്ദൂഹിന്റെ കുടുംബം കൊല്ലപ്പെട്ടത്. ഇസ്രായേൽ സേന എന്തുതന്നെ ചെയ്താലും തങ്ങൾ ഈ മണ്ണ് വിട്ടുപോകില്ലെന്ന് ദഹ്ദൂഹ് പറഞ്ഞു.