ലബനാനിൽ ആക്രമണം കടുപ്പിച്ച് ഇസ്രായേൽ; യെമനിലെ ഹൂതി ശക്തി​ കേന്ദ്രങ്ങളിലും ബോംബിട്ടു

ബെയ്റൂത്ത്: ബെയ്​റൂത്ത്​ ഉൾപ്പെടെ ലബനാനിലെ വിവിധ കേ​ന്ദ്രങ്ങൾക്കു പിന്നാലെ യെമനിലെ ഹുദൈദ തുറമുഖത്തിനു നേരെയും ഇസ്രായേലിൻറെ വ്യാപക വ്യോമാക്രമണം. ഹൂതി നിയന്ത്രണത്തിലുള്ള ഹുദൈദ തുറമുഖത്തും റാസ്​ ഈസയിലുമാണ്​ വ്യോമാക്രമണം നടന്നത്​. 8​ മരണവും നിരവധി പേർക്ക്​ പരിക്കേറ്റതായും ഹൂതികൾ സ്ഥിരീകരിച്ചു.

തുറമുഖത്ത്​ ശേഖരിച്ച എണ്ണ ആക്രമണഭീഷണിയെ തുടർന്ന്​ നേരത്തെ മാറ്റിയിരുന്നതായി ഹൂതികൾ വ്യക്​തമാക്കി. ആക്രമണത്തിൽ യു.എസ്​ സെൻട്രൽ കമാൻറും പങ്കുവഹിച്ചതായാണ്​ റി​പ്പാർട്ട്​. ഒരു പ്രദേശവും തങ്ങൾക്ക്​ വിദൂരത്തല്ലെന്ന്​ ഹൂതികൾ ഓർക്കണമെന്ന്​ ഇസ്രായേൽ പ്രതിരോധ മന്ത്രി യോവ്​ ഗാലൻറ്​ പറഞു. ഇസ്രായേലിനു നേർക്ക്​ മിസൈൽ ആക്രമണത്തിന്​ തുനിഞ്ഞാൽ കൂടുതൽ ശക്​തമായ തിരിച്ചടി എല്ലാവരും കാത്തിരിക്കണമെന്നും മന്ത്രി മുന്നറിയിപ്പ് നൽകി.

ബെയ്​റൂത്തിനും ദക്ഷിണ ലബനാനിലെ വിവിധ കേന്ദ്രങ്ങൾക്കും ​നേരെ വ്യാപക ആക്രമണം തുടരുകയാണ്​ ഇസ്രായേൽ. അമ്പതിലേറെ പേർ ഇന്നലെ മാത്രം കൊല്ലപ്പെട്ടു. മേഖലയിലെ വലിയ അഭയാർഥി പ്രവാഹമാകും ലബനാനിൽ സംഭവിക്കുകയെന്ന്​ പ്രധാനമന്ത്രി നജീബ്​ മികാത്തി പറഞു. സിവിലിയൻ കേന്ദ്രങ്ങളെയാണ്​ സൈന്യം ലക്ഷ്യം വെക്കുന്നത്​.

എന്നാൽ ഹിസ്​ബുല്ലയുടെ പ്രതിരോധ സംവിധാനങ്ങൾ ദുർബലപ്പെടുത്തുകയാണ്​ ആക്രമണ ലക്ഷ്യമെന്ന്​ ഇസ്രായേൽ പ്രതികരിച്ചു. ലബനാൻ അധിനിവേശത്തിനുള്ള തയാറെടുപ്പുകൾ ഇസ്രായേൽ ഊർജിതമാക്കി. അതിർത്തിയിൽ വിന്യസിച്ച മൂന്ന് ഡിവിഷൻ സൈനികർ കരയുദ്ധത്തിനുള്ള അനുമതിക്ക്​ കാത്തുനിൽക്കുകയാണെന്ന്​ സൈനിക ഉദ്യോഗസ്ഥരെ ഉദ്ധരിച്ച്​ ഇസ്രായേൽ മാധ്യമങ്ങൾ റിപ്പോർട്ട്​ ചെയ്തു. ഇസ്രായേലിൻറെ സുരക്ഷക്ക്​ ആവശ്യമായതൊക്കെ ചെയ്യുമെന്ന്​ പെൻറഗൺ വ്യക്തമാക്കി.

അതേസമയം മേഖലായുദ്ധം ഒഴിവാക്കണമെന്നും ഇതുമായി ബന്ധപ്പെട്ട്​ നെതന്യാഹുവുമായി സംസാരിക്കുമെന്ന് അമേരിക്കൻ പ്രസിഡൻറ് ജോ ബൈഡൻ പറഞ്ഞു. ഇസ്രായേൽ കേന്ദ്രങ്ങളെ ലക്ഷ്യമിട്ട്​ ഹിസ്​ബുല്ല നൂറിലേറെ മിസൈലുകളാണ്​ ഇന്നലെയും തൊടുത്തത്​. ഹൈഫയിൽ പത്തു ലക്ഷത്തോളം പേർ മിസൈൽ ആക്രമണഭീഷണി മൂലം സുരക്ഷിതകേന്ദ്രങ്ങൾ തേടേണ്ടി വന്നു​. ഇറാഖ്​, യെമൻ എന്നിവിടങ്ങളിൽ നിന്നും നിരവധി ഡ്രോണുകൾ വന്നെത്തിയതായി ഇസ്രായേൽ സ്ഥിരീകരിച്ചു. അതിനിടെ, ഗിദിയോൻ സാറിനെ മന്ത്രിസഭയിൽ ഉൾപ്പെടുത്തിയതായി നെതന്യാഹു വെളിപ്പെടുത്തി.