നാല്​ ലക്ഷം ചാർജിങ്​ പോയിന്‍റുകൾ; പുതിയ പദ്ധതിയുമായി ടാറ്റ മോട്ടോഴ്​സ്​

ന്യൂഡൽഹി: ഇന്ത്യയിലെ ചാർജിങ്​ അടിസ്ഥാന സൗകര്യങ്ങൾ വികസിപ്പിക്കാൻ ടാറ്റ മോട്ടോഴ്‌സ് ‘ഓപ്പൺ കൊളാബറേഷൻ 2.0’ പദ്ധതി പ്രഖ്യാപിച്ചു. മെഗാ ചാർജർ ശൃംഖല സ്ഥാപിക്കാനായി Tata.ev പ്രധാന ചാർജിങ്​ പോയിന്റ് ഓപ്പറേറ്റർമാരുമായി ധാരണയിലെത്തി.

2023 മുതൽ ടാറ്റ മോട്ടോഴ്‌സ് വിവിധ ചാർജിങ്​ ഓപ്പറേറ്റർമാരുമായും ഓയിൽ മാർക്കറ്റിങ്​ കമ്പനികളുമായും ചേർന്ന് പ്രധാന സ്ഥലങ്ങളിൽ, പ്രത്യേകിച്ച് ഹൈവേകളിൽ ഇവി ചാർജറുകൾ സ്ഥാപിക്കുന്നുണ്ട്​. ഇതിന്റെ ഫലമായി രാജ്യത്തെ പൊതു ചാർജിങ്​ പോയിന്റുകളുടെ എണ്ണം 15 മാസത്തിനുള്ളിൽ ഇരട്ടിയിലധികമായി. 18,000ലധികം ചാർജറുകളാണ്​ നിലവിലുള്ളത്​. 200ലധികം നഗരങ്ങളിലായി ടാറ്റ ഡീലർഷിപ്പുകളിൽ 1.5 ലക്ഷത്തിലധികം സ്വകാര്യ/ഹോം ചാർജറുകൾ, 2500 കമ്മ്യൂണിറ്റി ചാർജറുകൾ, 750 ചാർജറുകൾ എന്നിവയും കമ്പനി സ്ഥാപിച്ചിട്ടുണ്ട്.

2027 ആകുമ്പോഴേക്കും ചാർജിങ്​ പോയിന്റുകളുടെ എണ്ണം 4,00,000 ആയി വർധിപ്പിച്ച് ഇലക്ട്രിക് വാഹനങ്ങൾ കൂടുതൽ ഉപയോഗപ്രദവും സൗകര്യപ്രദവുമാക്കുക എന്നതാണ് ടാറ്റ മോട്ടോഴ്‌സിന്റെ ലക്ഷ്യം. പുതിയ സംരംഭത്തിന്​​ കീഴിൽ ചർജിങ്​ പോയിന്‍റ്​ ഓപ്പറേറ്റർമാർ 30,000 പുതിയ പൊതു ചാർജിങ്​ പോയിന്റുകൾ സ്ഥാപിക്കും. ഇവ എല്ലാ ഇലക്ട്രിക് വാഹന കമ്പനികൾക്കും ഉപയോഗിക്കാനാകും.

രണ്ട് വർഷത്തിനുള്ളിൽ 500 മെഗാ ചാർജറുകൾ സ്ഥാപിക്കാൻ ടാറ്റ പവർ, ചാർജ്​സോൺ, സ്റ്റാറ്റിക്​, സിയോൺ എന്നീ കമ്പനികളുമായി Tata.ev ധാരണാപത്രത്തിൽ ഒപ്പുവച്ചിട്ടുണ്ട്​. ആദ്യഘട്ടത്തിൽ ഈ സൂപ്പർഫാസ്റ്റ് ചാർജറുകൾ പ്രധാന നഗരങ്ങളിലും പ്രധാന ഹൈവേകളിലും സ്ഥാപിക്കും. ഇവ എല്ലാ ഇലക്ട്രിക് വാഹനങ്ങൾക്കും ഉപയോഗിക്കാനാകും. അതേസമയം, ടാറ്റ ഉപഭോക്താക്കൾക്ക് മുൻഗണനയുണ്ടാകും. IRA.ev ആപ്പ് വഴി ഉപഭോക്താക്കൾക്ക് മെഗാ ചാർജറുകൾ കണ്ടെത്താനും പണമടയ്ക്കാനും സാധിക്കും.