കാത്തിരിപ്പിന് വിരാമം! ഗംഗുബായ് കത്യവാടി, ആര്‍ആര്‍ആര്‍, അറ്റാക്ക് എന്നീ ചിത്രങ്ങള്‍ തിയറ്റര്‍ റിലീസിന്
പ്രഖ്യാപനം വന്നതോടെ മൂന്ന് ചിത്രങ്ങളും ഒടിടി റിലീസ് ചെയ്യുമെന്ന അഭ്യൂഹങ്ങള്‍ക്കാണ് അവസാനമായത്
Update: 2021-09-08 08:20 GMT
പ്രിയ താരങ്ങളെ വീണ്ടും ബിഗ് സ്ക്രീനില്‍ കാണാനുള്ള ആരാധകരുടെ ഒരുപാട് നാളത്തെ കാത്തിരിപ്പിന് വിരാമമാകുന്നു . ഗംഗുബായ് കത്യവാടി, ആര്‍ആര്‍ആര്‍, അറ്റാക്ക് എന്നീ ചിത്രങ്ങള്‍ തിയറ്റര്‍ റിലീസ് ചെയ്യുമെന്ന് നിര്‍മ്മാതാക്കള്‍ വ്യക്തമാക്കി.
ജയന്തിലാല്‍ വാഡയുടെ കീഴിലുള്ള പെന്‍ ഇന്ത്യ ലിമിറ്റഡിന്‍റെ ബാനറിലാണ് ഈ മൂന്ന് ചിത്രങ്ങളും നിര്‍മ്മിക്കുന്നത്. പ്രഖ്യാപനം വന്നതോടെ മൂന്ന് ചിത്രങ്ങളും ഒടിടി റിലീസ് ചെയ്യുമെന്ന അഭ്യൂഹങ്ങള്‍ക്കാണ് അവസാനമായത്.
ഈ ചിത്രങ്ങള്‍ ബിഗ് സ്ക്രീന്‍ ആസ്വാദനത്തിനു വേണ്ടി നിര്‍മ്മിച്ചതാണെന്നും ഒടിടിയില്‍ റിലീസ് ചെയ്യുമെന്ന വാദങ്ങള്‍ തെറ്റാണെന്നും പെന്‍ ഇന്ത്യ ലിമിറ്റഡ് തങ്ങളുടെ ഔദ്യോഗിക ട്വിറ്റര്‍ പേജിലൂടെ അറിയിച്ചു.
സഞ്ജയ് ലീലാ ബന്‍സാലിയുടെ സംവിധാനത്തില്‍ ആലിയ ബട്ട് നായികയാകുന്ന ചിത്രമാണ് ഗംഗുബായ് കത്യവാടി. പ്രേക്ഷകര്‍ ഈ വര്‍ഷം ഏറ്റവും കൂടുതല്‍ കാത്തിരിക്കുന്ന ചിത്രങ്ങളിലൊന്നാണിത്.
ആര്‍ രാജമൌലിയുടെ സംവിധാനത്തില്‍ രാം ചരണ്‍, ജൂനിയര്‍ എന്‍ടിആര്‍ , അജയ് ദേവ്ഗണ്‍, ആലിയ ബട്ട് തുടങ്ങിയവര്‍ ഒന്നിക്കുന്ന ചിത്രമാണ് ആര്‍ആര്‍ആര്‍.
അയ്യപ്പനും കോശിയും എന്ന മലയാള ചിത്രത്തിന്റെ റീമേക്ക് ആണ് അറ്റാക്ക്. ജോണ്‍ എബ്രഹാം, ജാക്വലീന്‍, രാകുല്‍ സിങ് പ്രീത് എന്നിവരാണ് ചിത്രത്തില്‍ അണിനിരക്കുന്നത്.