പ്രവാസികൾക്ക്​ ആഹ്ലാദം പകർന്ന്​ റിയാലുമായുള്ള രൂപയുടെ വിനിമയ നിരക്ക്​ ഉയരുന്നു

റിയാലിന്​ 169.93 രൂപ നിരക്കിലാണ്​ ധനവിനിമയ സ്ഥാപനങ്ങൾ ഇന്നു ഇടപാടുകൾ അവസാനിപ്പിച്ചത്

ഒരിടവേളക്ക്​ ശേഷം ശേഷം പ്രവാസികൾക്ക്​ ആഹ്ലാദം പകർന്ന്​ റിയാലുമായുള്ള രൂപയുടെ വിനിമയ നിരക്ക്​ ഉയരുന്നു. റിയാലിന്​ 169.93 രൂപ നിരക്കിലാണ്​ ധനവിനിമയ സ്ഥാപനങ്ങൾ ഇന്നു ഇടപാടുകൾ അവസാനിപ്പിച്ചത്​. ഡോളറുമായുള്ള രൂപയുടെ മൂല്യശോഷണം തുടരുമെന്നാണ്​ സാമ്പത്തിക വിദഗ്ധർ അഭിപ്രായപ്പെടുന്നത്​. അതോടെ വിനിമയ നിരക്കിലും വർധനവുണ്ടാകും.

കഴിഞ്ഞ ഫെബ്രുവരിയിൽ ഒരു റിയാലിന്​ 178.70 രൂപ വരെ വിനിമയനിരക്ക്​ ഉയർന്നിരുന്നു. കഴിഞ്ഞ ഏപ്രിൽ മുതൽ വിനിമയ നിരക്ക്​ 165നും 166 രൂപക്കും ഇടയിലായിരുന്നു. കഴിഞ്ഞ ആഴ്ചയുടെ അവസാനം മുതലാണ്​ ഇതിൽ നിന്ന്​ ഉയർച്ചയുണ്ടായത്​. ഇന്ത്യൻ സമ്പദ്​വ്യവസ്ഥയിൽ പ്രകടമായ മാന്ദ്യത്തിന്റെ ലക്ഷണങ്ങളാണ്​ രൂപയുടെ വിലയിടിവിന്​ കാരണം. ഡോളറിന്​ 65.24 രൂപ എന്ന നിലയിലാണ്​ ചൊവ്വാഴ്ച രൂപ വ്യാപാരം തുടങ്ങിയത്​. ഇത്​ 65.44 രൂപ വരെ ഉയർന്നു. ഡിസംബർ വരെ ഇടിവ്​ തുടരാനാണ്​ സാധ്യത. വിനിമയ നിരക്ക്​ റിയാലിന്​ 170 മുതൽ 172 രൂപ വരെ ഉയർന്നേക്കാം . വിനിമയനിരക്ക്​ ഉയർന്നതോടെ കൂടുതൽ ആളുകൾ നാട്ടിലേക്കു പണമയക്കാൻ ഉള്ള തയ്യാറെടുപ്പിൽ ആണ്.