മുവാസലാത്ത്​ ഈ വർഷം അവസാനത്തോടെ സ്മാർട്ടാകും

ഈ വർഷം അവസാനത്തോടെയോ അടുത്ത വർഷം ആദ്യത്തോടെയോ ബസുകൾ 'സ്മാർട്ട്​' ആക്കുകയാണ്​ ലക്ഷ്യം

ഒമാനിലെ ദേശീയ പൊതുഗതാഗത കമ്പനിയായ മുവാസലാത്ത്​ ഈ വർഷം അവസാനത്തോടെ സ്മാർട്ടാകും. യാത്രക്കാരുടെ സുരക്ഷയും പൊതുഗതാഗത സംവിധാനത്തിന്റെ പ്രവർത്തനമികവ്​ വർധിപ്പിക്കാനും സഹായിക്കുന്ന ഇന്റലിജന്റ്​ ഗതാഗത സംവിധാനം ബസുകളിൽ സ്ഥാപിക്കുന്നത്​ സംബന്ധിച്ച നടപടികൾ ആരംഭിച്ചതായി സി.ഇ.ഒ അഹമ്മദ്​ അൽ ബലൂഷി പറഞ്ഞു.

ഈ വർഷം അവസാനത്തോടെയോ അടുത്ത വർഷം ആദ്യത്തോടെയോ ബസുകൾ 'സ്മാർട്ട്​' ആക്കുകയാണ്​ ലക്ഷ്യം. ഇത്​ സ്ഥാപിക്കുന്നതോടെ യാത്രക്കാർക്ക്​ ബസ്​ ചാർജ്​ സ്മാർട്ട്​ കാർഡ്​ മുഖേനയും മൊബൈൽ ഫോൺ മുഖേനയുമെല്ലാം അടക്കാൻ സാധിക്കും. ഒരു റൂട്ടിൽ യാത്രക്കാരുടെ എണ്ണത്തിൽ പെട്ടെന്ന്​ വർധനവ്​ ഉണ്ടായാൽ ആ വിവരം ഗതാഗത നിയന്ത്രണ സംവിധാനത്തിന്​ കൈമാറാൻ ​ഐ.ടി.എസ്​ സംവിധാനത്തിന്​ സാധിക്കും. വാഹനങ്ങൾ എവിടെയെത്തി എന്നതിന്​ ഒപ്പം എത്തിചേരുമെന്ന്​ പ്രതീക്ഷിക്കപ്പെടുന്ന സമയവും മൊബൈൽ ഉപകരണങ്ങളിൽ ലഭ്യമാക്കാനും സാധിക്കും. സർവീസുകളുടെ കാര്യക്ഷമത ഉറപ്പാക്കാനും യാത്രക്കാരുടെയും ഡ്രൈവറുടെയും പെരുമാറ്റങ്ങൾ നിരീക്ഷിക്കാനും യാത്രക്കാരുടെ സുരക്ഷിതത്വം ഉറപ്പുവരുത്താനും ​ഐ.ടി.എസ്​ സംവിധാനം വഴി സാധ്യമാകുമെന്നും സി.ഇ.ഒ അഹമ്മദ്​ അൽ ബലൂഷി പറഞ്ഞു.

98 പുതിയ ബസുകൾ ഈ വർഷം അവസാനത്തോടെയോ അടുത്ത വർഷം ആദ്യത്തോടെയോ നിരത്തിലിറക്കാൻ സാധിക്കുമെന്നാണ്​ പ്രതീക്ഷയെന്നും സി.ഇ.ഒ പറഞ്ഞു. ഈ വർഷത്തിന്റെ ആദ്യ മാസങ്ങളിൽ 22ലക്ഷം യാത്രക്കാരാണ്​ മുവാസലാത്ത്​ സർവീസുകളിൽ യാത്ര ചെയ്തത്​.