യു.എ.ഇയിലേക്ക്​ സവാള കയറ്റുമതിക്ക്​ അനുമതി നൽകി ഇന്ത്യ

ദുബൈ: യു.എ.ഇയിലേക്ക്​ സവാള കയറ്റുമതി ചെയ്യുന്നതിന്​ അനുമതി നൽകി ഇന്ത്യ . 14,400 ടൺ സവാളയാണ്​ യു.എ.ഇയിലേക്ക്​ കയറ്റുമതി ചെയ്യാൻ ഇന്ത്യൻ സർക്കാർ അനുവദിച്ചിട്ടുള്ളത്​. ഇതോടെ ഉള്ളിവിലയിൽ കുറവ് വന്നേക്കും എന്നാണ് സൂചന.

ഓരോ മൂന്നു മാസത്തിലും 3,600 ടൺ എന്നനിലക്കാണ്​ കയറ്റുമതി ചെയ്യുകയെന്ന്​ ഡയറക്ടറേറ്റ് ജനറൽ ഓഫ് ഫോറിൻ ട്രേഡിന്‍റെ ഔദ്യോഗിക അറിയിപ്പിൽ വ്യക്തമാക്കി. ബംഗ്ലാദേശിലേക്കും സവാള കയറ്റുമതിക്ക്​ അധികൃതർ അനുമതി നൽകിയിട്ടുണ്ട്​. 2023 ഡിസംബറിലാണ്​ ഇന്ത്യ, 2024 മാർച്ച് വരെ സവാള കയറ്റുമതി നിരോധിച്ചത്​. എന്നാൽ വിവിധ രാജ്യങ്ങളുടെ അഭ്യർഥന മാനിച്ച്​ കേന്ദ്ര സർക്കാർ പ്രത്യേക അനുമതിയുടെ അടിസ്ഥാനത്തിൽ സവാള കയറ്റുമതി അനുവദിച്ചിരുന്നു.

വിലക്കയറ്റം തടയുന്നതിനും ആഭ്യന്തര വിപണിയിൽ ലഭ്യത ഉറപ്പുവരുത്തുന്നതിനുമാണ്​ സവാളയുടെ കയറ്റുമതിക്ക് നിയന്ത്രണമേർപ്പെടുത്തിയത്​. ഇന്ത്യൻ സർക്കാർ സവാള കയറ്റുമതിക്ക്​ താൽകാലിക നിയന്ത്രണം ഏർപ്പെടുത്തിയതോടെ യു.എ.ഇ ഉൾപ്പെടെയുള്ള രാജ്യങ്ങളിൽ വിലയിൽ മാറ്റമുണ്ടായിരുന്നു. ചില രാജ്യങ്ങളിൽ ഏതാണ്ട്​ ആറു മടങ്ങോളം​ വിലവർധനയുണ്ടായി. ഈ സാഹചര്യത്തിൽ തുർക്കി, ഇറാൻ, ചൈന എന്നീ രാജ്യങ്ങളിൽ നിന്നാണ് ​ഇന്ത്യക്ക്​ ബദലായി ഗൾഫ്​ രാജ്യങ്ങളിലേക്ക്​ സവാള കൂടുതലായി എത്തിയിരുന്നത്​​.

ഇന്ത്യൻ സവാളക്ക്​ ​ മുൻഗണന നൽകുന്ന ഉപഭോക്താക്കള്‍ക്ക്​ പുതിയ തീരുമാനം ആശ്വാസകരമാണ്​. റമദാൻ കൂടി അടുത്തെത്തിയ സാഹചര്യത്തിൽ വിപണിയിൽ ഇന്ത്യൻ സവാളക്ക്​ ആവശ്യക്കാർ വർധിക്കുമെന്നാണ്​ കരുതുന്നത്​. ഗൾഫിലേയും മറ്റ് ​രാജ്യങ്ങളിലേക്കും ​സവാള കയറ്റുമതി ചെയ്യുന്ന പ്രധാന രാജ്യമാണ്​ ഇന്ത്യ. ഈ സാഹചര്യത്തിൽ ഇന്ത്യ എടുക്കുന്ന തീരുമാനങ്ങൾ ഏറ്റവും കൂടുതൽ ബാധിക്കുന്നത്​ ഗൾഫ്​ ഉൾപ്പെടെയുള്ള രാജ്യങ്ങളെയാണ്​.

Full View