ബെംഗളൂരുവിൽ നിർമാണത്തിലുള്ള കെട്ടിടം തകർന്ന് മൂന്നു മരണം; 14 പേർ കുടുങ്ങിക്കിടക്കുന്നു

ബെംഗളൂരു: ബെംഗളൂരുവിൽ നിർമാണത്തിലിരുന്ന ബഹുനില കെട്ടിടം തകർന്ന് മൂന്നുപേർ മരിച്ചു. രണ്ടുപേരെ രക്ഷപ്പെടുത്തി. 14 പേർ കെട്ടിടത്തിനുള്ളിൽ കുടുങ്ങിക്കിടക്കുന്നതായാണ് വിവരം. ബാബുസപല്യയിൽ ചൊവ്വാഴ്ച വൈകിട്ടാണ് അപകടമുണ്ടായത്.

നഗരത്തിൽ ഒരാഴ്ചയായി കനത്ത മഴ തുടരുകയാണ്. ഇതിനിടെയാണ് കെട്ടിടം തകർന്നത്. രക്ഷാപ്രവർത്തനം പുരോഗമിക്കുകയാണെന്ന് ബെംഗളൂരു ഈസ്റ്റ് ഡെപ്യൂട്ടി കമ്മീഷണർ ഡി. ദേവരാജ് പറഞ്ഞു. നിർമാണത്തിലെ അപാകതയാണ് കെട്ടിടം തകരാൻ കാരണമെന്ന് പൊലീസ് പറഞ്ഞു.