ദക്ഷിണാഫ്രിക്കയില്‍ നിന്നും ഇന്ത്യയിലേക്ക് ഒരു ഡസനിലധികം ചീറ്റകള്‍ ഉടനെത്തും; കേന്ദ്രമന്ത്രി ജ്യോതിരാദിത്യ സിന്ധ്യ

ഡല്‍ഹി: വരും മാസങ്ങളിൽ 14 മുതൽ 16 വരെ ചീറ്റകൾ ഇന്ത്യയിലെത്തുമെന്ന് പ്രതീക്ഷിക്കുന്നതായി കേന്ദ്രമന്ത്രി ജ്യോതിരാദിത്യ സിന്ധ്യ. വന്യജീവി സംരക്ഷണത്തിനും സുസ്ഥിരതയ്ക്കും വേണ്ടി സർക്കാർ സമഗ്രമായ ശ്രമങ്ങൾ നടത്തുന്നുണ്ടെന്നും മന്ത്രി വ്യാഴാഴ്ച പറഞ്ഞു.

ഭാവി തലമുറകൾക്കായി പ്രകൃതിയെ സംരക്ഷിക്കേണ്ടതിന്‍റെ പ്രാധാന്യം ഊന്നിപ്പറയുന്നതിനിടയിൽ, ഒരു രേഖീയ സമ്പദ്‌വ്യവസ്ഥയ്ക്ക് ഇപ്പോൾ ഇടമില്ലെന്നും "ടേക്ക്, മേക്ക്, ഡിസ്‌പോസ് മോഡലിന് ഒരു സ്ഥാനവുമില്ല" എന്നും അദ്ദേഹം പറഞ്ഞു.വന്യജീവികളെ സംരക്ഷിക്കുകയും അവ വളരുന്നുണ്ടെന്ന് ഉറപ്പാക്കുകയും ചെയ്യേണ്ടത് നമ്മുടെ പാരമ്പര്യത്തിന്റെ വളരെ പ്രധാനപ്പെട്ട ഭാഗമാണെന്നും സിന്ധ്യ പറഞ്ഞു. കഴിഞ്ഞ 9 വര്‍ഷമായി വന്യജീവി സംരക്ഷണത്തിനായി സര്‍ക്കാര്‍ നടപ്പാക്കുന്ന പദ്ധതികളെക്കുറിച്ചും കേന്ദ്രമന്ത്രി മാധ്യമപ്രവര്‍ത്തകരോട് പറഞ്ഞു.

നിലവിൽ, പ്രോജക്ട് ചീറ്റയുടെ രണ്ടാം ഘട്ടത്തിലാണ്. കൂടാതെ ദക്ഷിണാഫ്രിക്കയുമായി ഒരു കരാറിൽ ഒപ്പുവച്ചിട്ടുണ്ട്.പ്രോജക്ട് ചീറ്റയ്ക്ക് കീഴിൽ നമീബിയയിൽ നിന്ന് എട്ട് ചീറ്റകളെ വിമാനമാർഗം ഇന്ത്യയിലെത്തിച്ചിരുന്നു. കഴിഞ്ഞ വർഷം സെപ്റ്റംബറിൽ പ്രധാനമന്ത്രി നരേന്ദ്ര മോദി മധ്യപ്രദേശിലെ കുനോ പാൽപൂർ ദേശീയ ഉദ്യാനത്തിൽ ഈ ചീറ്റപ്പുലികളെ തുറന്നുവിട്ടിരുന്നു.