ജമ്മുകശ്മീരിലെ ഡോഡയിൽ ഭീകരരുമായി ഏറ്റുമുട്ടൽ; നാല് ജവാന്മാർക്ക് വീരമൃത്യു

ന്യൂഡൽഹി: ജമ്മുകശ്മീരിലെ ഡോഡ ജില്ലയിൽ ഭീകരരുമായി നടന്ന ഏറ്റുമുട്ടലിൽ നാല് ജവാന്മാർക്ക് വീരമൃത്യു. 3 സൈനികരും ഒരു ആർമി ഓഫീസറുമാണ് വീരമൃത്യു വരിച്ചത്. മേഖലയിൽ രാത്രി ആരംഭിച്ച സംഘർഷം ഇപ്പോഴും തുടരുകയാണ്.

ഇന്നലെ രാത്രിയാണ് ഏറ്റുമുട്ടലുണ്ടായത്. ഡോഡയിലെ വനമേഖലയിൽ ഭീകരരുണ്ടെന്ന വിവരത്തിന്റെ അടിസ്ഥാനത്തിൽ 8 മണിയോടെ സേന ഇവിടേക്ക് തിരിച്ചിരുന്നു. പൊലീസും സൈന്യവും സംയുക്തമായി തെരച്ചിൽ നടത്തുന്നതിനിടെയാണ് ആക്രമണമുണ്ടാകുന്നത്.

കഴിഞ്ഞ രണ്ട് മാസത്തിനിടെ ജമ്മുകശ്മീരിലുണ്ടാകുന്ന ഒമ്പതാമത്തെ ഭീകരാക്രമണമാണിത്. ഡോഡയിലെ വിവിധ മേഖലകളിൽ ഭീകരർ എത്തിയിട്ടുണ്ടെന്ന് വിവരത്തിന്റെ അടിസ്ഥാനത്തിൽ തെരച്ചിൽ ഊർജിതമാക്കിയിരുന്നു.